Tags-Muskurahat

vo jaise sardiyoñ meñ garm kapḌe de faqīroñ ko
laboñ pe muskurāhaT thī magar kaisī hiqārat sī

namī sī aañkh meñ aur hoñT bhī bhīge hue se haiñ
ye bhīgā-pan hī dekho muskurāhaT hotī jaatī hai

jahāñ kal har qadam par muskurāhaT raqs kartī thī
maiñ ḳhush huuñ aaj bhī vo raunaq-e-bāzār zinda hai

muskurāhaT meñ koī tanz bhī ho saktā hai
ye masarrat kī alam-dār ho aisā bhī nahīñ

laboñ kī surḳhī batā sakī na to kyā huā baat ho ga.ī hai
kalā.iyoñ ke tamām gajroñ kā muskurāhaT se baat karnā

tumhārī āñkhoñ kī muskurāhaT meñ
merī chāhat kī raushnī hai

lab pe surḳhī kī jagah jo muskurāhaT mal rahe haiñ
hasratoñ kā bojh shānoñ par uThā kar chal rahe haiñ

aañkh pur-nam magar muskurāhaT mirī
kah rahī thī kahānī mire ishq kī

muskurāhaT ho yā aa.heñ yā ḳhushī ke aañsū
har ik ehsās kī lazzat meñ samāyā hai tū

tumhārī muskurāhaT rach ga.ī hai
har us ġhunche meñ jis par ro ga.e ham

chhupā chhupā sā phirā dard muskurāhaT meñ
jo saath the unheñ pahchān meñ nahīñ aayā

ḳhāmushī meñ hī lā-javāb na thā
muskurāhaT kā bhī hisāb na thā

ek paikar sā dhueñ ke biich lahrāne lagā
nīm-vā hoñToñ pe raqsāñ muskurāhaT sī huī

zahr meñ Duubī huī ik muskurāhaT
maut kā paiġhām ho kar rah ga.ī hai

hameñ tum muskurāhaT do
tumheñ ham khilkhilāte roz o shab deñge

vo khoyā khoyā sā un kā aalam laboñ pe halkī sī muskurāhaT
adā ye un kī 'matīn' jaise sunā bhī hai aur sunā nahīñ hai