Tags-Naaz

parda-e-dar par kisī ko naaz hai
ham ko nazroñ kī rasā.ī par ghamanD

naaz hai qātil ko apnī teġh par
teġh ko hai kaj-adā.ī par ghamanD

kis naaz kis andāz se tum haa.e chalo ho
roz ek ġhazal ham se kahlvā.e chalo ho

har ek zarra-e-āshiq hai āftāb-parast
ga.ī na ḳhaak hue par havā-e-jalva-e-nāz

hai raam ke vajūd pe hindostāñ ko naaz
ahl-e-nazar samajhte haiñ us ko imām-e-hind

naala mere lab pe aatā hai jo sau sau naaz se
koī partav le uḌā shāyad tirī raftār kā

nāz-o-adā hai tujh se dil-ārām ke liye
ye jaama qat.a hai tire andām ke liye

nāz-āfrīñ mirā bhī ḳhirām-e-niyāz dekh
mahshar meñ muskurātā huā aa rahā huuñ maiñ

umr-e-āshiq-o-ma.ashūq sarf-e-nāz-o-hairat hai
husn hai adā-pardāz ishq hai tamāshā.ī

vahāñ vo nāz-o-ishve se qadam gin gin ke rakhte haiñ
yahāñ is muntazir kā vaqt pahuñchā dam-shumārī kā

haath aa.ī huī baazī pe bahut naaz na kar
jītne vaale tujhe maat bhī ho saktī hai

baḌā hī naaz thā apnī ḳhunuk-mizājī par
zamīñ ke tapte tave par jhulas gayā paanī

merī qismat hī nahīñ merī tabāhī kā sabab
is meñ us shoḳh kī shāmil nigah-e-nāz bhī hai

dil kī kuchh qadar karte rahiyo tum
ye hamārā bhī nāz-parvar thā

kahte haiñ maarā gayā vo jurm-e-teġh-e-nāz se
kūcha-e-qātil meñ 'nāsiḳh' naam jo bechāra gayā

tamāzatoñ meñ bas ik ḳhushk peḌ kī chhāñv
hai jis pe naaz bahut vo bhī āgahī kyā hai

kis ġhash pe tumheñ naaz hai ai hazrat-e-mūsā
un kī nigah-e-hosh-rubā ko nahīñ dekhā

un ko jo shuġhl-e-nāz se fursat na ho sakī
ham ne ye kah diyā ki mohabbat na ho sakī

jo vo ba.ad bosa ke naaz se zarā jhiḌke hai to 'nazīr' ko
kabhī misrī hai kabhī qand hai kabhī shahd hai kabhī raab hai

imtihāñ zabt kā phir bazm-e-gah-e-nāz meñ hai
jalva-e-tūr nigāh-e-ġhalat-andāz meñ hai