Tags-Naaz

tū kare naaz tujhe yaar zamāna chāhe
tā-abad ye rahe ābād tirā ḳhāna-e-ishq

ḳhushbū jo pyaar kī mujhe detā thā ab vahī
rakhtā hai dast-e-nāz meñ ḳhanjar mire liye

ho naach rañgīlī pariyoñ kā baiThe hoñ gul-rū rañg-bhare
kuchh bhīgī tāneñ holī kī kuchh nāz-o-adā ke Dhañg-bhare

apnī fitrat kī bulandī pe mujhe naaz hai kab
haañ tirī past-nigāhī se gila hai mujh ko

husn kā naaz āshiqī kā niyāz
ab to kuchh bhī vo mājrā na rahā

tire aane pe ai tīr-e-nigāh-e-nāz maiñ ḳhush huuñ
dil-e-betāb meñ aa kar hisāb-e-dostāñ ho jā

kis kā faroġh-e-aks hai kaun hai mahv-e-nāz meñ
kauñd rahī haiñ bijliyāñ ā.īna-e-majāz meñ

dafn hai dil jagah jagah ka.aba hai gaam gaam par
sajda kahāñ kahāñ kare koī harīm-e-nāz meñ

naaz kartā thā tavālat pe ki vaqt-e-ruḳhsat
bhed saa.e pe khulā shaam kī ayyārī kā

dil nigāh-e-nāz ke uThne se pahle uTh gayā
mere ehsāsāt kī raftār kitnī tez hai

ik hama-tan hai pā-e-nāz ik hama-tan sar-e-niyāz
ye to chalan jahāñ kā hai jitnā de dabā.e jā

donoñ haiñ nāz-e-dilbarī zid meñ hai jin kī aur lutf
ek taraf lagā.e jā ek taraf bujhā.e jā

qār.īn-e-nigah-e-nāz hī samjhe vo ḳhat
surḳh Doroñ meñ jo tahrīr hai armāñ ke liye

haa.e rī be-iḳhtiyārī ye to sab kuchh ho magar
us sarāpā naaz se kyūñkar ḳhafā ho jā.iye

rahe yuuñ naaz apne zehn par lāhaq ġhamoñ meñ bhī
ḳhushī kā ik na ik pahlū ye tāham DhūñD letā hai

saaqī ke idhar jaam idhar nāz-o-adā se
jādū-nazrāñ ḳhush-nighāñ pesh-e-nazar the

tumhāre ishq meñ miT kar tumheñ dikhā dūñgā
nigāh-e-nāz kā īmāñ samajh gayā huuñ maiñ

arz-e-nāz-e-shoḳhi-e-dandāñ barā.e-ḳhanda hai
dāvā-e-jamiyat-e-ahbāb jā-e-ḳhanda hai

ḳhirad bātil ḳhirad par naaz bātil
magar ye to junūñ bātil nahīñ hai

na kamī koī tire naaz meñ na kamī hai zauq-e-niyāz meñ
to vafā.eñ merī hī pesh kar mire ḳhūn-e-dil ke javāz meñ