Tags-Naaz

jeb-e-niyāz-e-ishq nishāñ-dār-e-nāz hai
ā.īna huuñ shikastan-e-tarf-e-kulāh kā

ġhāfil ba-vahm-e-nāz ḳhud-ārā hai varna yaañ
be-shāna-e-sabā nahīñ turra gayāh kā

unheñ aur ilm-e-rah-e-vafā ye yaqīñ bhī aa.e to kis tarah
ki unhī ke dāman-e-nāz par kahīñ ḳhāk-e-rāh-e-vafā nahīñ

ye ġhalat ki mahfil-e-nāz meñ koī āshnā-e-nazar na thā
koī tum se kah to rahā thā kuchh magar aah tum ne sunā nahīñ

hasīn sūrat hameñ hamesha hasīñ hī ma.alūm kyuuñ na hotī
hasīn andāz-e-dil-navāzī hasīn-tar naaz barhamī kā

kuchh bhī ho par in āñkhoñ ne akasr ye aalam bhī dekhā
ishq kī duniyā nāz-e-sarāpā husn kī duniyā ijz-e-mujassam

kamī kar gayā nāz-e-pinhāñ kā ḳhanjar
na jaañ tere bismil kī haihāt niklī

naaz hai mujh ko ki āġhāz-e-tajassus huuñ maiñ
mujh se pahle bhī koī thā ye maiñ kyā suntā huuñ

ishq-e-roz-afzūñ pe apne mujh ko hairānī na thī
jalva-e-rañgīñ pe tujh ko nāz-e-yaktā.ī na thā

saañs letī hai vo zamīn 'firāq'
jis pe vo naaz se guzarte haiñ

un kī ḳhushbū hai fazāoñ meñ pareshāñ har sū
naaz kartī hai havā-e-chamanistāñ kyā kyā

vo ḳhvāb-e-nāz meñ the mirā dīda-e-niyāz
dekhā kiyā aur un kī balā.eñ liyā kiyā

dushman o dost ke liye chāhiye shukr-e-teġh-e-nāz
kaun hai qatl-gāh meñ aaj jo surḳh-rū nahīñ

kahāñ tak naaz uThā.e āḳhir ai husn
havas tere mizāj-e-ḳhud satā kā

jin pe sau naaz kare anjuman-ārā.ī bhī
ġhaur se dekhā to vo log bhī tanhā nikle

piile patte sūkhī shāḳhoñ par bhī to akasr chamkā chāñd
mujh se milne kabhī na aa.ī terī naaz kī paalī raat

maiñ apne ishq-e-farāvāñ pe naaz kartā huuñ
mirā kamāl mire husn-e-intiḳhāb meñ hai

duniyā ko kyā ḳhabar? mirī duniyā phir aa ga.ī
vo rūh-e-nāz o jān-e-tamannā phir aa ga.ī

rakhtā hai qadam naaz se jis dam tū zamīñ par
kahte haiñ farishte tujhe jai arsh-e-barīñ par

nigāh-e-nāz ko terī maiñ sharminda na dekhūñgā
haTā.e letā huuñ apnī nazar achchhā na dekhūñgā