Tags-Naaz

aamad principal kī hai hoshyār laḌkiyo
ye vaqt hai shaguftan-e-gul-hā-e-nāz kā

yuuñ lagā jaise ki bal khā ke dhanak TuuT ga.ī
us ne vaqfa jo liyā naaz se añgḌā.ī meñ

unheñ dil de diyā nādīda 'afqar'
hijāb-o-ġhamza-o-nāz-o-adā kyā

lutf-e-ḳhās us kā samajh kar dil se karte haiñ qubūl
jo bhī dast-e-nāz se achchhā burā paate haiñ log

zinda the dushman to mujh ko bāzuoñ pe naaz thā
aañkh ko un ke guzar jaane pe tar maiñ ne kiyā

kahnā kisī kā sub.h-e-shab-e-vasl naaz se
hasrat tumhārī jaan hamārī nikal ga.ī

'hurmat' ye dil hai apnī tabāhī pe jis ko naaz
vo phuul hai jo khilne se pahle bikas gayā

maar Daalā muskurā kar naaz se
haañ mirī jaañ phir usī andāz se

ham se aur bār-e-musībat uTThe
ham to haiñ naaz uThāne vaale

vafā tum se kareñge dukh saheñge naaz uThā.eñge
jise aatā hai dil denā use har kaam aatā hai

karam kā mehr-o-mohabbat kā zikr kyā ab to
sitam ke naaz uThāo ki ḳhvāb larzāñ haiñ

vo ba-zo.am-e-husn haiñ ḳhud-nigar to mujhe bhī naaz hai ishq par
maiñ niyāz-mand sahī magar mujhe 'soz' pās-e-anā bhī hai

akasr to tirā burā bhī chāhā
kyā jāniye ḳhud pe naaz kyā hai

tiflī ne be-ḳhudī kā āġhāz kiyā
quvvat pe shabāb ne baḌā naaz kiyā

āj-kal haa.e tire naaz ke hāthoñ ai yaar
sadma pahuñche hai tire qalb ko nālāñ ham haiñ

yuuñ un laboñ ke mas se mo.attar huuñ jis tarah
vo nau-bahār-e-nāz thā ḳhushbū piye hue

hazār tarah se gardish meñ āftāb rahā
nigāh-e-nāz kā lekin kahāñ javāb rahā

aa ki ġhurbat-kada-e-dahr meñ jī bahlā.eñ
ai dil us jalva-gah-e-nāz meñ kyā rakkhā hai

un se baḌh-chaḌh ke to ai dost haiñ yādeñ in kī
nāz-o-andāz-o-adā meñ tirī rakkhā kyā hai