Tags-Naaz

vo kahte haiñ kyā zor uThāoge tum ai 'dāġh'
tum se to mirā naaz uThāyā nahīñ jaatā

vo jis dam nusḳha-e-nāz-o-adā āġhāz kartā hai
to ham kahte haiñ ik ik aan par vallāh bismillāh

qadam is naaz se rakhtā huā aatā hai mahfil meñ
ki ahl-e-bazm sab kahte haiñ bismillāh bismillāh

allāh-re ḳhirām-e-nāz un kā
ik baar to āsmāñ Thahar jaa.e

ab vo nigāh-e-nāz huī mā.il-e-karam
jab koī mudda.ā na mire dil meñ rah gayā

nigāh-e-yār jise āshnā-e-rāz kare
vo apnī ḳhūbi-e-qismat pe kyuuñ na naaz kare

vo āh-e-dil jise sun sun ke aap hañste the
ḳhadañg-e-nāz kā āḳhir javāb ho ke rahī

ek dushman ke kahe par naaz vo bhī is qadar
apne matlab ko kisī ne aap kī gaa.ī to kyā

qudrat itne naaz paidā kar sakegī yā nahīñ
un kā jitnā sarf tere nāz-bardāroñ meñ hai

avval-e-ishq hai aur ham-safarī kī lazzat
aur āhista qadam aur zarā naaz ke saath

zamāne-bhar ke tum ko nāz-o-naḳhre kyuuñ uThāne haiñ
ḳhudā se ho na vābasta to Dar achchhā nahīñ lagtā

merī aadat hai vafā dil meñ shakebā.ī hai
baat yuuñ bārgah-e-nāz meñ ban aa.ī hai

kis naaz se vaah ham ko maarā
kī tirchhī nigāh ham ko maarā

batn har sañg meñ dekhe jo koī paikar-e-nāz
kis ko hāsil vo sanam-sāz-nazar hai baabā

jahāñ hai sar-ba-sajda ishq ab tak
yahī vo bārgāh-e-nāz bhī hai

uf-rī manāzil-e-buland tere harīm-e-nāz kī
pā-e-talab ko kitne tai karne paḌe haiñ āsmāñ

rūh-e-pazh-murda-e-taḳhayyul lab-o-mus.haf-e-nāz
is udāsī kā sabab mere ta.iiñ tū bhī nahīñ

haa.e turbat pe marī naaz se kahnā un kā
aap leTe hue ab hashr tak ārām kareñ

lage terī balā mujhe āfat-e-jāñ kabhū phir bhī ye kah ke khilā.egā paañ
mire sar kī qasam mirī jaañ kī qasam mire ġhamza-o-nāz-o-adā kī qasam

ye shabāb-o-husn terā aur ye nāz-o-adā
TūTtī haiñ donoñ hāthoñ se tirī añgḌā.iyāñ