Tags-Naaz

siyāh raat sī chhā.ī vo zulf chehre par
jabīn-e-nāz gulābī badan gulābī ho

ab ruuh kāñptī hai ajal hai qarīb-tar
ai ham-nasīb nāz-o-adā kam bahut hī kam

zebā nahīñ hai dost se karnā mo.āmla
kuchh varna naaz jaan ke badle girāñ nahīñ

vo garm-e-sarf-e-nāz the vaañ bazm-e-ġhair meñ
sargarm us taraf mirā dil sarf-e-jāñ meñ thā

be-sabab sāyoñ ko apne lambe qad pe naaz hai
ḳhaak meñ mil jā.eñge ye shaam kā āġhāz hai

shab-e-visāl kahāñ ḳhvāb-e-nāz kā mauqa.a
tumhārī niiñd ko aate hayā nahīñ aatī

bas huā naaz ho chukā aġhmāz
har ghaḌī ham se kiyā adā hai ye

is meñ paatā huuñ kuchh tirī ḳhūbī
mujh ko be-vaj.h dil pe naaz nahīñ

nāvak-e-nāz se mushkil hai bachānā dil kā
dard uTh uTh ke batātā hai Thikānā dil kā

naaz ne phir kiyā āġhāz vo andāz-e-niyāz
husn-e-jāñ-soz ko phir soz kā da.avā hai vahī

phir huā ham ko dil-o-dīñ kā bachānā mushkil
nigah-e-nāz kā phir ham se taqāzā hai vahī

phir lagā rahne vahī silsila-e-nāz-o-niyāz
jalva-e-husn vahī zauq-e-tamāshā hai vahī

hai nāz-e-husn se jo farozāñ jabīn-e-yār
labrez āb-e-nūr hai chāh-e-zaqan tamām

is liye naaz hai dariyāoñ se nisbat rakh kar
un kā anjām samundar meñ utar jaanā hai

rūThoge be-sabab to manāyā na jā.egā
bejā tumhārā naaz uThāyā na jā.egā

kabhī bolnā vo ḳhafā ḳhafā kabhī baiThnā vo judā judā
vo zamāna naaz o niyāz kā tumheñ yaad ho ki na yaad ho

lucknow naaz hai jis par vahī kohna tahzīb
ham ne virse meñ salīqe se sambhālī huī hai

us kī nigāh-e-nāz ne be-ḳhud banā diyā
ḳhud mujh ko apne-āp kī ab hai ḳhabar kahāñ

na ahl-e-nāz ko bhī mile fursat-e-niyāz
maiñ duur haT gayā jo vo guzre qarīb se

ham bārgāh-e-nāz meñ us be-niyāz kī
paidā kiye ga.e haiñ shikāyāt ke liye