Tags-Naaz

ik baar yuuñ hī dekh liyā thā ḳhirām-e-nāz
phir lab pe naam sarv o saman kā nahīñ rahā

maiñ ārzū-e-jāñ likhūñ yā jān-e-ārzū!
tū hī batā de naaz se īmān-e-ārzū!

ham pe aur teġh-e-nāz uTh na sake
chochle haiñ tirī nazākat ke

tarāz-e-shoḳhī-e-pā hai gyāh-e-sabz kī maañg
ḳhirām-e-nāz kā andāz āb-jū māñge

vo naaz ban ke phir āḳhir niyāz ho ke rahā
unheñ ġhurūr jo merī fuġhāñ se pahle thā

kahtā hai ye nāz-e-dil-rubā.ī
ai āshiqo jaan niyāz kiije

pāmāl-e-ḳhirām-e-nāz kiije
Thukrā.iye sarfarāz kiije

falak bhī tāl-bandī kī zamīñ par naaz kartā hai
ki us kā tā.ir-e-dil arsh par parvāz kartā hai

galiyoñ meñ ghamsān kā ran hai ma.arka dast-ba-dast hai yaañ
jise bhī ḳhud par naaz bahut ho āñgan se bāhar aa.e

mahfil-e-yār kī rah jā.egī aadhī raunaq
naaz ko us ne agar anjuman-ārā na kiyā

sheva-e-nāz hosh chhal jaanā
tarz-e-raftār dil kuchal jaanā

ba-juz parvāz-e-shauq-e-nāz kyā baaqī rahā hogā
qayāmat ik havā-e-tund hai ḳhāk-e-shahīdāñ par

nahīñ iqlīm-e-ulfat meñ koī tūmār-e-nāz aisā
ki pusht-e-chashm se jis kī na hove mohr unvāñ par

tamām harf-o-hikāyat miTā ga.ī dil se
nigāh-e-nāz ne kahne ko kuchh kahā bhī nahīñ

nigāh-e-nāz-e-ibārat hai zindagī jis se
sharīk-e-dard to kyā dard-āshnā bhī nahīñ

milā.ūñ kis kī āñkhoñ se maiñ apnī chashm-e-hairāñ ko
ayaañ jab har jagah dekhūñ usī ke nāz-e-pinhāñ ko

kabhī gesū na bigḌe qātil ke
nāz-bardār haiñ mire dil ke

hai bahut naaz tujhe zabt-e-fuġhāñ par 'fazlī'
ye ḳhamoshī bhī kahīñ tarz-e-fuġhāñ hī to nahīñ

be-fikr ho gayā huuñ dil-o-jāñ se is liye
us kī nigāh-e-nāz nigahbān ho ga.ī