Tags-Naaz

pahuñche haiñ jo apnī manzil par un ko to nahīñ kuchh nāz-e-safar
chalne kā jinheñ maqdūr nahīñ raftār kī bāteñ karte haiñ

shabāb ne ḳhud-numā banāyā ye nāz-e-ḳhushrūī ne jatāyā
hayā meñ jis vaqt farq aayā to un ke mukhḌe se zulf sarkī

sajde maqbūl nahīñ bārgah-e-nāz meñ ab
āstāñ husn kā sajde nahīñ sar māñge hai

vo kuchh doshīzgān-e-nāz-parvar
khaḌī haiñ ik bisātī kī dukāñ par

ab itnā naaz samundar-mizājiyoñ pe na kar
ki apne aap meñ ik jazr-o-mad to ham bhī haiñ

hashr tak yuuñ hī raheñge ġhamza-o-andāz-o-nāz
ishq-e-ālī-manzilat se husn-e-vālā-jāh ke

qadam uThe bhī nahīñ bazm-e-nāz kī jānib
ḳhayāl abhī se pareshāñ hai dekhiye kyā ho

ham aaj khā.eñge ik tiir imtihāñ ke liye
ki vaqf karnā hai dil nāz-e-jāñ-sitāñ ke liye

aave jo naaz se mirā vo but-e-sīm-bar ba-bar
kaahe ko le phire mujhe merā nasīb dar-ba-dar

is qadar naaz na kiije ki buzurgoñ ne bahut
bārhā bazm-e-ḳhud-ārā.ī sajā.ī huī hai

khule hai naaz se gulshan meñ ġhuncha-e-nargis
zarā dikhā to use chashm-e-nīm-ḳhvāb to de

shahīd-e-nāz ġhazab ke hunar-varāñ nikle
lahū ke chhīñToñ se apnā kafan banāte haiñ

muftī-e-nāz ne diyā fatvā
ḳhūn-e-āshiq halāl kartā hai

hajla-e-nāz se aate haiñ bulāve ab ke
āḳhirī baar chalo āḳhirī dīdār karo

us nigāh-e-nāz ne yuuñ rāt-bhar tajsīm kī
sab charāġhoñ meñ barābar raushnī taqsīm kī

bas ik tajallī-e-rañgīñ bas ik tabassum-e-nāz
riyāz-e-dahr meñ phūloñ kī zindagī kyā hai

dil-kushā thī nigāh-e-nāz us kī
tiir kyuuñ us kā dil-kushā na huā

yārab tirā kamāl-e-hunar ham pe ḳhatm hai
yā sirf mashq-e-nāz kā ik tajraba haiñ ham

baḌe naaz se aaj ubhrā hai sūraj
himāla ke ūñche kalas jagmagā.e

letā hai dast-e-nāz ke bose
ham se achchhā life-boy