Tags-Naaz

baiTheñ pas-e-kār-e-ḳhvesh kyūñ-kar
jo naaz tire uThā rahe haiñ

chheḌā vo hasīñ shab ne tamannāoñ kā jaadū
lahrā ga.ī ḳhalvat-kada-e-nāz meñ ḳhushbū

saḳht bedard hai tāsīr-e-mohabbat ki unheñ
bistar-e-nāz pe sote se jagā rakkhā hai

zamāna tālib-e-dīdār hotā jalva-e-nāz
bachī hai tuur ke jalne se aabrū terī

qāmat pe apnī naaz kare koh-e-shām-e-ġham
ghabrā ke aaj marsiya-ḳhvānī kareñge ham

har ahl-e-havas zīnat-e-ḳhalvat-kada-e-nāz
har ahl-e-vafā aaj sar-e-dār khaḌā hai

falak ko milānā thā gar ḳhaak meñ
to phir nāz-o-ne.amat se kyuuñ ham pale

us nigāh-e-nāz kā allāh re faiz
nisbateñ haiñ zaḳhm-e-dil ko tiir se

ai lab-e-nāz kyā haiñ vo asrār
ḳhāmushī jin kī tarjumānī hai

kisī kī shān-e-taġhāful se hai vaqār-e-nāz
umiid nāma-o-paiġhām kī nahīñ achchhī

is ḳhūbi-e-qismat pe mujhe naaz bahut hai
vo shaḳhs mirī jaañ kā talabgār huā hai

gard-e-rāh-e-yār hai sāmān-e-nāz-e-zaḳhm-e-dil
varna hotā hai jahāñ meñ kis qadar paidā namak

sar-e-niyāz jhukā.egā kyā koī ḳhuddār
nigāh-e-nāz se jab daad hī nahīñ miltī

nahīñ bhātā mujhe koī rashk-e-parī koī laakh hasīñ ho balā se mirī
mirā dil tirā āshiq-e-shefta hai mujhe tere hī nāz-o-adā kī qasam

kabhī vaqt-e-nāz-o-niyāz hai kabhī mahv-e-zulf-e-ayāz hai
magar us pe bhī dil-e-ġhaznavī karam-āshnā-e-nazar nahīñ

phir bhī āñkheñ DhūñDhtī haiñ ik sarāpā naaz ko
maiñ ne maanā kuchh nahīñ hadd-e-nazar mere liye

ishva-o-nāz tirā ham se yahī kahtā hai
nahīñ karte jo kabhī tiir ḳhatā ham hī haiñ

abhī nazroñ meñ phirtā hai vo bazm-e-nāz kā manzar
mire dil se tire jalvoñ kī arzānī nahīñ jaatī

ḳhudā.ī pe hai is qadar naaz jin ko
ḳhudā vo hamāre banā.e hue haiñ

maujūd the abhī abhī rū-posh ho ga.e
ai mast-e-nāz tum to mire hosh ho ga.e