Tags-Naaz

ajiib haal ke majnūñ the jo ba-ishva-o-nāz
ba-sū-e-bād ye mahmil meñ baiTh kar aa.e

maqsad hai nāz-o-ġhamza vale guftugū meñ kaam
chaltā nahīñ hai dashna-o-ḳhanjar kahe baġhair

naaz hai mujh pe mere saane ko
zahmat-e-rā.egāñ nahīñ huuñ maiñ

adā-o-nāz-e-īmā chashm-e-ġhamza go vo koī ho
ta.alluq jis se ho jaa.e balā-e-nāgahānī hai

sitam meñ lutf, jafā meñ adā nigāh meñ naaz
itaab meñ bhī haiñ pinhāñ ināyateñ kyā kyā

koī kyā khā.egā yuuñ sachchī qasam jhūTī qasam
us nigāh-e-nāz kī saugandh khāne kī kaho

baat bantī aur bātoñ se nazar aatī nahīñ
is nigāh-e-nāz kī bāteñ banāne kī kaho

aao ġhubār-e-rāh meñ DhūñDeñ shamīm-e-nāz
aao ḳhabar bahār kī pūchheñ ḳhizāñ se ham

ai nau-bahār-e-nāz tirī nik.hatoñ kī ḳhair
dāman jhaTak ke nikle tire gulsitāñ se ham

naaz ko nuur kar diyā sarvar-e-kā.ināt ne
vo jo lagī thī tuur par aa ke bujhī hijāz meñ

apne niyāz-mand hai parde kī rasm-o-rāh hai
varna hijāb ko kahāñ daḳhl harīm-e-nāz meñ

hai vahī nāz-āfrīñ ā.īna-e-niyāz meñ
jis kī ziyā hai soz meñ jis kī sadā hai saaz meñ

bahār-e-gul-kada-e-nāz dil-kushā hai magar
nasīm-e-shauq ḳhirāmāñ nahīñ to kuchh bhī nahīñ

vo barq-e-nāz gurezāñ nahīñ to kuchh bhī nahīñ
magar sharīk-e-rag-e-jāñ nahīñ to kuchh bhī nahīñ

khul ga.iiñ zulfeñ magar us shoḳh mast-e-nāz kī
jhūmtī bād-e-sabā phirtī hai mastānī huī

Tāñge vaale haiñ samand-e-nāz ke upar savār
ābla-pā.ī ye kahtī hai ki ab chalnā hai baar

bajā tirā nāz-e-be-niyāzī magar ye insāf bhī nahīñ hai
ki terī duniyā meñ tere bande butoñ kī dete phireñ duhā.ī

tumheñ to naaz bahut dostoñ pe thā 'jālib'
alag-thalag se ho kyā baat ho ga.ī pyāre

tujh ko ye naaz ki to ḳhāliq-e-naġhma hai 'ḳhayāl'
mujh ko ye faḳhr ki tū ne mujhe barbād kiyā

jalvoñ ko dekhtī rahī merī nigāh-e-shauq
kuchh bhī harīm-e-nāz ke darbāñ na kar sake