Tags-Naaz

naaz detā nahīñ gar ruḳhsat-e-gul-gasht-e-chaman
ai chaman-zār-e-hayā dil ke gulistān meñ aa

kyuuñ girafta-dil nazar aatī hai ai shām-e-firāq
ham jo tere naaz uThāne ke liye maujūd haiñ

na nazar kī dīda-varī rahī na jigar kī be-jigarī rahī
magar ahl-e-da.ava-e-shauq se tirī barham-e-nāz bharī rahī

jinheñ apnī quvvat-e-zabt pe kabhī naaz thā
vahī ashk dard kī shiddatoñ ke asiir haiñ

husn ke naaz uThāne ke sivā
ham se aur husn-e-amal kyā hogā

jahān-o-jāñ kā sitam aarzū kā lutf-o-karam
tirī adā se tire naaz se ibārat hai

naqsh-e-nāz-e-but-e-tannāz ba-āġhosh-e-raqīb
pā-e-tā.ūs pa.e-ḳhāma-e-mānī māñge

naaz kī teġh ġhair par mat khīñch
dil hamārā kahīñ na jaave kaT

aao kabhū to paas hamāre bhī naaz se
karnā sulūk ḳhuub hai ahl-e-niyāz se

ab bhalā kaun kare chaak garebān-e-junūñ
azmat-e-zulf ghaTī chashm-e-kañval-nāz girī

yuuñ to har dar pe hī kahte nazar aa.e dāman
khīñchte naaz se jis ko vahī dāmāñ na milā

ai 'falak' naaz hai faqīrī meñ
mujh ko bosīda in libādoñ par

nigah-e-nāz se ḳhudā kī panāh
kyā bachā.e koī qazā kī choT

fusūñ ḳhayāl hai tahrīk-e-shauq-e-ra.anā.ī
vo mast-e-nāz mirā ḳhud-numā bane na bane

lutf jab hai ki rahe ishq sadā mahv-e-niyāz
aur is baat pe bhī naaz na hone paa.e

be-ḳhudī aa.ī thī un ke ba.ad bazm-e-nāz meñ
phir nahīñ ma.alūm ham ko kaun aayā kis ke ba.ad

kyuuñ na ho naaz apnī qismat par
mujh ko apnā banā liyā us ne

ḳhajil hūñgā matā-e-ishq par shāyad kisī din
abhī is faisle par naaz karnā chāhtā huuñ

ik hijr jo ham ko lāhaq hai tā-der use dohrā.eñ kyā
vo zahr jo dil meñ utaar liyā phir us ke naaz uThā.eñ kyā

jinheñ raushnī kā lihāz thā jinheñ apne ḳhvāb pe naaz thā
maiñ unhī kī saf meñ jalā kiyā maiñ usī qatār meñ bujh gayā