Tags-Naqab

na chhup sakeñgī sadāqat kī talḳhiyāñ 'rāshid'
barahna shakl ko alfāz kī naqāb na de

tū kabhī jo bhūle se be-naqāb ho jaa.e
muntaqil haqīqat meñ apnā ḳhvāb ho jaa.e

vo husn-e-ḳhud-farosh agar be-naqāb ho
mahtāb mushtarī ho ḳharīdār āftāb

kyuuñ na ulTī naqāb chehre se
hashr kī kyuuñ huī hayā maan.e

maiñ rū-e-yār kā mushtāq ho ke aaya thā
tire jamāl kā shaidā to ai naqāb na thā

shab-e-visāl bhī vo shoḳh be-hijāb na thā
naqāb ulaT ke bhī dekhā to be-naqāb na thā

kahā jo maiñ ne ki yūsuf ko ye hijāb na thā
to hañs ke bole vo muñh qābil-e-naqāb na thā

naqāb ruḳh se uThā chuke haiñ khaḌe hue muskurā rahe haiñ
maiñ hairatī-e-azal huuñ ab bhī vo ḳhaak hairāñ banā rahe haiñ

phir ḳhayāloñ kī jannateñ na rahīñ
to agar be-naqāb ho jaa.e

chamakte aariz ghaTā se gesū
haTā diyā hai naqāb niilā

huā yaqīñ ki zamīñ par hai aaj chāñd-gahan
vo maah chehre pe jab Daal kar naqāb aayā

hamārā zauq-e-nigāh ab tak hai gumrahī kī naqāb oḌhe
ajab tamāshā hai tere jalvoñ meñ mah-jabīñ raushnī nahīñ hai

saa.e kā ik naqāb sā ruḳh par bikhar gayā
yaaro sahar jo us ke garebān se Dhalī

lab pe naġhma aur ruḳh par ik tabassum kī naqāb
apne dil kā dard ab 'mullā' ko kahnā aa gayā

vaañ naqāb uTThī yahāñ chāñdnī ne khet kiyā
kaT ga.ī zulmat-e-shab chāñd se ruḳhsāroñ se

kise ḳhabar thī ki ban ke barq-e-ġhazab giregā yahī chaman par
vo husn jo muskurā rahā thā naqāb-e-abr-e-ravāñ se pahle

isī ummīd par to jī rahe haiñ hijr ke maare
kabhī to ruḳh se uTThegī naqāb āhista āhista

paḌā thā us ke bhī ruḳh par naqāb-e-nā-maujūd
mirī bhī aañkh pe ik dast-e-ġhā.ebāna thā

ummīd-o-bīm meñ rakkhā tamām raat mujhe
kabhī naqāb uThā.ī kabhī hijāb aayā

hogā koī sharīr sā jhoñkā nasīm kā
jis ne tirī naqāb uThā.ī vo ham na the