Tags-Nazakat

nafīs naak nazākat sirāt adl bahār
jamīl sutvāñ mo.attar latīf ḳhushbū rachī

jis ke baazū kī salābat par nazākat kā madār
jis ke kas-bal par akaḌtā hai ġhurūr-e-shahryār

ye nazākat kī numā.ish ye fareb-āmez chaal
dosh-e-hastī par terā nāpāk hastī hai vabāl

zor bal uf-re is nazākat par
ḳhalq kā dil dukhā.e baiThe haiñ

hameñ to qatl kiyā bas isī nazākat ne
ki vo uThātī haiñ teġh aur nahīñ ukastī hai

Tuk phuul chhuā thā so nazākat se ka.ī baar
rah rah ke dikhā.ī mujhe gul-hāt kī garmī

nazākat kā ye aalam phuul bhī toḌe to bal khā kar
na jaane dil mirā kis tarah toḌā pahlvāñ ho kar

naaz hai gul ko nazākat pe chaman meñ ai 'zauq'
us ne dekhe hī nahīñ nāz-o-nazākat vaale

vo nāznīñ ye nazākat meñ kuchh yagāna huā
jo pahnī phūloñ kī baddhī to dard-e-shāna huā

nikāl dūñgā shab-e-vasl bal nazākat ke
Darā liyā hai bahut tevriyāñ chaḌhā ke mujhe

mushābah kar diyā kyuuñ zo.af ne un kī nazākat se
mujhe ḳhud apne uupar rashk aayā nā-tavāñ ho kar

kyā nazākat hai sabā us kī kamar kī jis ne
sub.h-dam tār-e-rag-e-gul se qamar-bañd kiyā

lachakte hī kamar zulf-e-rasā kī jhoñk lene se
asar ma.ashūq-pan kā hai nazākat aa hī jaatī hai

naaz kī qāmat-e-zebā kī bayāñ kyā kiije
pairahan bhī jahāñ uslūb-e-nazākat māñge

yuuñ to kyā aa.egā tū fart-e-nazākat se yahāñ
saḳht dushvār hai dhoke meñ bhī aanā terā

'yāvar' ham ko pā na sakoge jaise ab haiñ aise kab the
dil kī nazākat jurm-e-mohabbat kufr-e-tamannā kyā nahīñ dekhā

shāḳh-e-gul kī nazākat ubālī ga.ī
narm bāñhoñ ke sāñche meñ Dhālī ga.ī

pasīna aa gayā un ko kiyā va.ada jo aane kā
burī hai naaz bardārī nazākat aa hī jaatī hai

tum ko nazākat aur ḳhudā de ham ko lazzat aur ḳhudā de
pā.eñche tum chuTkī se uThā lo thāme hue chalte haiñ kamar ham