Tags-Neend

pahlū se uThe dard ne āñkhoñ meñ jagah lī
afsos tujhe niiñd yahāñ kaun sī jā deñ

maiñ ronā chāhtā huuñ ḳhuub ronā chāhtā huuñ maiñ
phir us ke baad gahrī niind sonā chāhtā huuñ maiñ

raat meñ baaqī kuchh nahīñ niiñd meñ baaqī kuchh nahīñ
apnā har ek ḳhvāb to nazr-e-avām ho chukā

niiñd par bhī lag ga.iiñ pābandiyāñ
jab se ḳhvāboñ meñ huzūr aane lage

us ne apne dam ko phūñkā aur mujhe bedār kiyā
maiñ paanī thā maiñ zarra thā lambī niiñd se jaagā maiñ

sub.h kā ḳhvāb umr bhar dekhā
aur phir niiñd aa ga.ī 'anjum'

vo ek niiñd kī jo shart thī adhūrī rahī
hamārī jāgtī āñkhoñ meñ ḳhvāb aa.e nahīñ

phir havā ne Tiin kī chādareñ gardanoñ par pheñkīñ
maa.eñ niiñd se laḌne lagīñ

tanhā.ī se aatī nahīñ din raat mujhe niiñd
yā-rab mirā ham-ḳhvāb o ham-āġhosh kahāñ hai

aañkh khul jaa.e to ghar mātam-kada ban jā.egā
chal rahī hai saañs jab tak chal rahā huuñ niiñd meñ

mujh ko jis naav meñ aanā thā kahīñ Duub ga.ī
ḳhvāb hai niiñd ke sāhil pe pareshān mirā

kabhī dikhā de vo manzar jo maiñ ne dekhe nahīñ
kabhī to niind meñ ai ḳhvāb ke farishte aa

ye kund aur yaḳh be-numū niiñd jis meñ
shab-e-irtiqā aur sub.h-e-harīrā kā taaza amal rā.egāñ ho rahā hai

niiñd se pahle jhilmil karte aa jaate haiñ ḳhvāb-e-mujassam
so jā.ūñ to jo bhī dekhūñ ḳhvāb bhulānā paḌ jaatā hai

ek to der talak niiñd nahīñ aatī hai
aur phir ḳhvāb bhī to pichhle pahar aatā hai

ḳhvābo tum āhista aanā
merī niiñd kā pul jarjar hai

kisī kī niiñd abhī tak hai beach dariyā meñ
kisī ke ḳhvāb kināre utar ke aa.e haiñ

ik na.ī dāstāñ sunāne do
aaj kī niiñd phir gañvāne do

judā.iyoñ ke zaḳhm dard-e-zindagī ne bhar diye
tujhe bhī niiñd aa ga.ī mujhe bhī sabr aa gayā

dhyān meñ gul-rū ke chain aatā nahīñ afsāna-gar
le sabā se gaah bū-e-yār bahlātī hai niind