Tags-Nigaah

bhuul ga.ī hai aaj to rahbar-e-haq-nigāh ko
bhuul ga.ī hai aaj tū mard-e-jahāñ-panāh ko

dil-e-hazīñ kī tamannā nigāh ke matlūb
ḳhudā rakhe vo sabhī kuchh haiñ chāragar ke sivā

vo bhī 'sājid' thā mire jazboñ kī chorī meñ sharīk
us kī jānib kyuuñ nahīñ uTThī nigāh-e-shak koī

gulchīñ abas nigāh rakhe hai mirī taraf
maiñ is chaman meñ juuñ gul-e-rañg-e-parīda huuñ

ham bhī ga.e haiñ hosh se saaqī kabhī kabhī
lekin tirī nigāh ke atvār dekh kar

kaTtā kahāñ tavīl thā rātoñ kā silsila
sūraj mirī nigāh kī sachchā.iyoñ meñ thā

husn us shoḳh kā hai bas ki malīh us kī nigāh
dil pe karte haiñ mire kār-e-ḳhadañg aur namak

mirī nigāh meñ daur-e-zamāñ kī har karvaT
lahū kī lahr diloñ kā dhuāñ gulāb ke phuul

be-nigāh āñkhoñ se dekhte haiñ parche ko
be-ḳhayāl hāthoñ se

maiñ ik nigāh kī duurī pe īstāda thā
guzarne vaale ne dekhā nahīñ guzarte hue

har ik jagah tū hī jalva-gar hai vo but-kada ho yā tūr-e-sīnā
nigāh-e-duniyā hai kor bātin tirī tajallī kidhar nahīñ hai

mire liye har ik nazar malāmatoñ meñ Dhal ga.ī
na kuchh kiyā to hairat-e-nigāh kar diyā mujhe

ḳhushī jo ġham se mil ga.ī to phuul aag ho ga.e
junūn-e-bandagī ne ḳhud-nigāh kar diyā mujhe

adā se dekh lo jaatā rahe gila dil kā
bas ik nigāh pe Thahrā hai faisla dil kā

saaqī kī ik nigāh ne baḳhshī hayāt-e-nau
dil meñ machal ga.e mire armāñ na.e na.e

muddat ke ba.ad us ne sar-e-anjuman 'zamīr'
dekhā nigāh-e-ām se aur ḳhaas kar mujhe

is tarah kuchh rañg bhar jaatā nigāh-e-shauq meñ
jalva ḳhud betāb ho jaatā vo parda dekhte

jinheñ ma.alūm hai terī nigāh-e-nāz kā aalam
vo apne zabt ke da.avoñ ko ḳhud bātil samajhte haiñ

sair kartā hai vo aalam kī mirā paik-e-nigāh
laakh hai be-dast-o-pā lekin hai phir sau kaam kā

abhī to terī tabī.at ko jītne ke liye
dil o nigāh kī sharteñ bhī hārnā hoñgī