Tags-Nigaah

kisī pe yuuñ nahīñ paḌtī nigāh-e-ḳhūn-ā-shām
hamīñ haiñ tīr-e-sitam ke nishāñ bahut achchhā

gah is fasīl-e-yād kī qindīl par nigāh
gah asp-e-harf-o-ḳhvāb kī raftār dekhnā

nigāh-e-shauq kyā Thahrī vo goyā belcha Thahrī
makān-e-yār kī dīvār meñ jis se ki rauzan ho

tirī nigāh ki hai pāsbān-e-mustaqbil
sunā rahī hai hameñ dāstān-e-mustaqbil

visāl-o-hijr se kyā ishq se sambhal na sakīñ
tirī nigāh meñ aisī nadāmateñ niklīñ

nigāh-e-ishq dil-e-zinda kī talāsh meñ hai
shikār-e-murda sazā-vār-e-shahbāz nahīñ

jis se hujūm-e-ġhair meñ hotī haiñ chashmakeñ
us ajnabī nigāh se bhī āshnā karo

usī nigāh se piine meñ lutf hai saarā
alāva us ke koī aur jaam mat lenā

mire qarīb se aksar vo is tarah guzrā
nigāh bhar ke use dekhnā muhāl huā

mire āñsuoñ ne kahā na thā ki bichhaḌ ke phir na mileñge ham
tujhe yaad ho ki na yaad ho vo nigāh-e-bāz-pasīñ mirī

nigāh pher ke jā to rahā hai tū lekin
tire baġhair basar kaise zindagī hogī

nigāh-e-yār mirī samt phir uThī hogī
sambhal sakūñgā na maiñ aisī ye be-ḳhudī hogī

kabhī kabhī kī mulāqāt thī sau vo bhī ga.ī
tirī nigāh kā rañg-e-bahāna-jū bhī nahīñ

likhte rahe ḳhūn-e-dil se jise tā.īd-e-nigāh-e-dost meñ ham
'iqbāl' ab us afsāne kā unvān badalnā mushkil hai

sukūt-e-lab kā vo sabab haiñ siskiyāñ vo hichkiyāñ
nigāh-e-ishq se faro vo hādisa nahīñ huā

dekheñ jo kisī aur taraf bhī vo sar-e-bazm
maqsūd-e-nigāh-e-ġhalat-andāz hamīñ haiñ

adā-e-tūl-e-suḳhan kyā vo iḳhtiyār kare
jo arz-e-hāl ba-tarz-e-nigāh-e-yār kare

is nigāh-e-nāz kī ek ek baat
hai hamāre piir ke aqvāl meñ

kyā us nigāh-e-hausla-afzā ko deñ javāb
gum kar diyā jise vo tamannā kahāñ se laa.eñ