Tags-Nigaah

nigāh milte hī rañg-e-hayā kī sūrat haiñ
chhalak uThīñ tire ruḳh se latāfateñ dil kī

safar meñ sar pe tirī dhun to thī savār magar
nigāh meñ koī manzil na koī rasta thā

us kī hayāt us ke liye maut ai 'azīz'
jis par ki us nigāh kā ehsāñ nahīñ rahā

paanī se sag-gazīda Dare jis tarah 'asad'
Dartā huuñ aa.ine se ki mardum-gazīda huuñ

shāyad ma.āl-e-ḳhanda-e-gul hai nigāh meñ
lab par kalī kalī ke ajab zahr-e-ḳhand hai

auroñ kī taraf tu dekhtā hai
īdhar bhī to kar nigāh zālim

nigāh-e-nāz kā hāsil hai e'tibār mujhe
havā-e-shauq zarā aur bhī nikhār mujhe

aalam tamām ek fareb-e-nigāh hai
ab kyā dikhā.ūñ chashm-e-haqīqat-nigar ko maiñ

rakh na tū ab dareġh nīm-nigāh
maar mat dekh nīm-jāñ dil ko

savāl kyā karūñ tujh se gunāhgār huuñ maiñ
nigāh chaar ho kyūñ-kar ki sharmsār huuñ maiñ

jis ko dekho churā rahā hai nigāh
kis galī se guzar rahā huuñ maiñ

nāsūr ho ki roz-e-qayāmat talak bahe
jis ke jigar meñ tiir lage tujh nigāh kā

fazā na bujhne lage is ḳhayāl se akasr
dil o nigāh ke raste ujaal ke dekhe

ajiib rañgoñ se mujh ko sañvār detī hai
ki vo nigāh-e-satā.ish nahīñ siñghār se kam

merī nigāh-e-fikr meñ 'anvar'
ishq fasāna husn hai uryāñ

dekhe jo merī nekī ko shak kī nigāh se
vo aadmī bhī to mire andar hai kyā karūñ

bhalā huā 'josh' ne haTāyā nigāh kā chashm-e-tar se parda
balā se jaatī raheñ gar āñkheñ khulā to band-e-naqāb terā

yahī to haiñ do sutūn-e-mahkam inhīñ pe qaa.im hai nazm-e-ālam
yahī to hai rāz-e-ḳhuld-o-ādam nigāh merī shabāb terā

nigāh-e-mast-e-haqīqat to de chukī thī javāb
magar ye dil hī thā phir us ne hoshiyār kiyā

tirī nigāh kī naqqāshi-e-hasīñ ke sivā
tū hī batā mirā mafhūm-e-zindagī kyā hai