Tags-Nigaah

jo milī nahīñ mujhe āgahī hai mirī nigāh se ajnabī
ho rag-e-gulū se qarīb bhī to yahī kaheñge milā nahīñ

tamām ishq kī jāgīr ho ga.ī duniyā
tirī nigāh pe duniyā ko vārtā hai koī

ye hai nigāh se dar-parda teġh-zan qātil
ki iltiyām ye zaḳhm-e-jigar nahīñ aatā

ḳhudārā is taraf bhī ik nigāh-e-lutf ho jaa.e
mirī hastī hama hasrat hama ālām hai saaqī

dil nigāh-e-nāz ke uThne se pahle uTh gayā
mere ehsāsāt kī raftār kitnī tez hai

har āshnā nigāh yahāñ ajnabī lagī
majbūr ho ke ghar se nikalnā paḌā mujhe

Thahrī hī thī nigāh ki manzar badal gayā
ruknā paḌā mujhe kabhī chalnā paḌā mujhe

gar nigāh-e-shauq ko mahv-e-tamāshā dekhiye
qahr kī nazroñ se masrūf-e-sazā ho jā.iye

ham jamā kar nigāh baiThe haiñ
apnī qismat kā dar khulā hī nahīñ

qasam fareb-e-nigāh-o-dil kī hameñ to us justujū ne khoyā
vahīñ thī dar-asl apnī manzil qadam uThe the jahāñ se pahle

tumhāre ishq meñ miT kar tumheñ dikhā dūñgā
nigāh-e-nāz kā īmāñ samajh gayā huuñ maiñ

ye baat sach hai ki marnā sabhī ko hai lekin
alag hī hotī hai lazzat nigāh-e-qātil kī

yuuñ kho gayā thā husn hujūm-e-nigāh meñ
ahl-e-nazar ko apnī nazar kā patā na thā

dekho nigāh-e-shauq se merī taraf mujhe
ye mudda.ā hai aur koī mudda.ā nahīñ

utar to sakte ho yaar lekin ma.aal par bhī nigāh kar lo
ḳhudā-nā-karda sukūn-e-sāhil na raas aayā to kyā karoge

nigāh-o-dil meñ bhī lāzim hai ik muravvat-o-kaif
numūd-e-āriz-o-gesū hī dilbarī to nahīñ

ham us nigāh-e-nāz ko samjhe the neshtar
tum ne to muskurā ke rag-e-jāñ banā diyā

le ga.ī dil ko kisī kī ik nigāh-e-avvalīñ
maiñ kisī ke husn par yak-bārgī shaidā huā

ai nigāh-e-dost ai sarmāya-dār-e-be-ḳhudī
hosh aatā hai to hotī hai pareshānī mujhe