Tags-Nigaah

faroġh-e-jalva-e-ummīd terī umr darāz
siyāh raat hai sar par sahar nigāh meñ hai

azīz-tar tirī bāteñ ki is sukūt ke saath
tamām shoḳhī-e-lafz-o-bayāñ nigāh meñ hai

vo kam-nigāh thā magar us se churā ke aañkh
maiñ ne bhī apne saath kuchh achchhā nahīñ kiyā

diloñ se ārzū-e-umr-e-jāvedāñ na ga.ī
koī nigāh pas-e-gard-e-kārvāñ na ga.ī

jin kī hurmat pe kuchh nahīñ hai nigāh
in ko pā-posh kā talā kahiye

idhar se bhar diyā mai ne nigāh kā sāġhar
udhar se zulf kā halqa gale kā jaal huā

vo log ḳhush-nasīb the apnī nigāh meñ
jo har kisī ke shauq kī ḳhud dāstāñ bane

ye havā-e-ġham ye fazā-e-nam mujhe ḳhauf hai ki na Daal de
koī parda merī nigāh par koī raḳhna tere jamāl meñ

koī kiran hai yahāñ to koī kiran hai vahāñ
dil o nigāh ne kis darja rog haiñ paale

bas ek nigāh kī thī us ne
saarā chehra nikhar gayā hai

sipāh-e-tāza bhī us kī saf-e-nigāh se hai
safā-e-sīna-e-shmshīr par hai naam us kā

phir nigāh-e-shauq kī garmī hai aur rū-e-nigār
phir araq-ālūd ik kāfir kī peshānī hai aaj

ab bhī ḳhudā-parast hai dair-o-haram kī qaid meñ
haa.e nigāh-e-nā-rasā haa.e mazāq-e-nā-tamām

nigāh-e-lutf ho is dil pe bhī o-shīsha-ba-dast
is aa.ine se bhī sūrat tirī nikaltī hai

kiijo 'muhib' nigāh ye chhāpa hai aur hī
ganda kare hai dil ko nagīñ us kī chhāp kā

jab nigāh-e-talab mo'atabar ho ga.ī
manzil-e-shauq dushvār-tar ho ga.ī

pas-e-nigāh koī lau bhaḌaktī rahtī hai
ye raat mere badan par saraktī rahtī hai

nigāh-e-shoḳh o chashm-e-shauq meñ dar-parda chhantī hai
ki vo chilman meñ haiñ nazdīk ham chilman ke baiThe haiñ

nigāh-e-shauq se yuuñ ġhair ko tirā taknā
'navāz' aur nahīñ kuchh mujhe satānā thā