Tags-Nigaah

ik nazar meñ dard kho denā dil-e-bīmār kā
ye to adnā sā karishma hai nigāh-e-yār kā

maiñ qafas meñ huuñ qafas pesh--e-nigāh-e-sayyād
par-e-parvāz meñ jumbish kā gumāñ hotā hai

nigāh-o-ruḳh par hai likhī jaatī jo baat lab par rukī huī hai
mahak chhupe bhī to kaise dil meñ kalī jo ġham kī khilī huī hai

ḳhush-rañg-o-ḳhush-nigāh ḳhush-andām ḳhūb-rū
phaile hue haiñ shahr meñ qātil jagah jagah

kuchh is tarah nigāh se iz.hār kar ga.e
jaise vo mujh ko vāqif-e-asrār kar ga.e

jamāl-e-yār-o-jūebār-o-jām par nigāh hai
ba-nām-e-bandagī butān-e-bām par nigāh hai

ba-zid haiñ phir bhī kaj-nazar hayāt shād-kām hai
numā.ish-o-numūd-o-nañg-o-nām par nigāh hai!

nigāh meñ liye hue ghuTī ghuTī sī justujū
bhaTak rahe haiñ vādī-e-ḳhizāñ meñ bahr-e-rañg-o-bū

dil meñ samā ga.ī haiñ qayāmat kī shoḳhiyāñ
do-chār din rahā thā kisī kī nigāh meñ

merī to har nigāh hai vaqf-e-ubūdiyat
vo har adā meñ husn-e-kalīsā liye hue

saaqī nigāh-e-nāz se lillāh kaam le
sau jaam pī chukā huuñ magar be-ḳhudī nahīñ

tirī nigāh-e-mohabbat-navāz hī kī qasam
ki aaj tak to hameñ tujh sā dūsrā na milā

nigāh-e-shauq meñ be-nūriyoñ kā rañg baḌhā
nigāh-e-shauq ko jab koī dūsrā na milā

tirā jamāl fazāoñ meñ muntashir thā magar
nigāh-e-shauq ko phir bhī tirā pata na milā

hamārā aañsū vo be-bahā hai nigāh-e-hasrat meñ jach rahā hai
mañgā ke ab us pe chaurahe meñ nisār karne guhar ko chaliye

donoñ kā rabt hai tirī mauj-e-ḳhirām se
laġhzish ḳhayāl kī ho ki Thokar nigāh kī

bāgeñ khiñchīñ masāfateñ kaḌkīñ faras ruke
maazī kī rath se kis ne palaT kar nigāh kī

jab bhī ġham-e-zamāna se āñkheñ huiiñ do-chār
muñh pher kar tabassum-e-dil par nigāh kī

rūhoñ meñ jaltī aag ḳhayāloñ meñ khilte phuul
saarī sadāqateñ kisī kāfir nigāh kī

ik umr dil kī ghaat se tujh par nigāh kī
tujh par tirī nigāh se chhup kar nigāh kī