Tags-Aitbaar

miyān-e-iḳhtiyār-o-e'tibār ik hadd-e-fāsil hai
jo hāthoñ meñ nahīñ aate vo phir bāhoñ meñ aate haiñ

mujh ko na thā ḳhud apnī nigāhoñ pe e'tibār
aur us ne e'tibār kiyā haa.e kyā kiyā

din aaj kā sukūñ se guzar jaa.e fikr kar
har aane vaale kal kā kise e'tibār hai

be-barg-o-bār jism thā mahrūm-e-e'tibār
sar-gamī-e-sabā ne shajar ko shajar kiyā

asar sharāb kā ahd-e-vafā-e-yār meñ hai
qadam qadam pe jo laġhzish sī e'tibār meñ hai

koī qīmat nahīñ aise vafā ke ahd-o-paimāñ kī
mujhe jis par yaqīñ aa.e na un ko e'tibār aa.e

vo ek fikr jo bā-e'tibār kartī hai
nazar meñ kābil-sad-iftiḳhār kartī hai

ye but uThā.eñ jo qur.āñ bhī ka.abe meñ ai 'rind'
ḳhudā se ham to hoñ munkir jo e'tibār kareñ

ba-rañg-e-ġhuncha zabāñ hai dahāñ meñ zer-e-zabāñ
tumhāre qaul kā kyā ḳhaak e'tibār kareñ

aa.e na aa.e be-ḳhabar kyā tujhe ye ḳhabar nahīñ
saañs kā e'tibār kyā shaam hai to sahar nahīñ

jo tirī nazar meñ pinhāñ na ye e'tibār hotā
mirī jaañ ġhubār hotī mirā dil mazār hotā

agar mere liye kahte na hargiz e'tibār aatā
vo auroñ ke liye royā chalo maiñ maan letā huuñ

kisī ke lab pe jo aa.e naved-e-zīst bane
vahī hadīs-e-vafā jis pe e.atibār na ho

maiñ us kī baat ke lahje kā e'tibār karūñ
karūñ ki us kā na maiñ aaj intizār karūñ

tire va.ade par jiye ham to ye jaan jhuuT jaanā
ki ḳhushī se mar na jaate agar e'tibār hotā

na ḳhirad rahī na junūñ bachā dil-e-pur-ġhurūr ye kyā huā
tujhe apne aap pe ḳhud bhī ab zarā e'tibār nahīñ hai

maiñ ab kisī kī bhī ummīd toḌ saktā huuñ
mujhe kisī pe bhī ab koī e'tibār nahīñ

adam bahut hī agar rūThne lagī ummīd
kisī ke va.ade pe phir e'tibār kar lūñgā

mirī hasrateñ miTeñgī mire ḳhvāb hoñge puure
mujhe apne is yaqīñ par zarā e'tibār kam hai