Tags-Aitbaar

ye jhijhak, lihāz, rutba, ye hudūd, ye tavāzun
kabhī hāl-e-dil batāte, kabhī e'tibār karte

ye jhijhak rah-e-vafā meñ, ye shikāyat-e-taġhāful
hameñ dhaḌkanoñ meñ paate agar e'tibār karte

ye fazā-e-be-yaqīñ hī banī rabt meñ tavāzun
na ye rasm-o-rāh rahtī agar e'tibār karte

yaqīñ hai aa.egā daur-e-masarrat
kisī ko e'tibār aa.e na aa.e

aksar to log pahlī sadā par hī bik ga.e
bolī to go lagī thī baḌe e'tibār kī

janāb-e-'nūh' zamāne kā e'tibār nahīñ
burā kiyā jo kisī se ġhurūr maiñ ne kiyā

maiñ dekhtā huuñ aap ko hadd-e-nigāh tak
lekin mirī nigāh kā kyā e'tibār hai

shu.ūr-e-zīst sahī e'tibār karnā bhī
ajab tamāsha hai lail-o-nahār karnā bhī

merī vafā vafā nahīñ un kī jafā jafā nahīñ
haa.e usī kā naam hai ālam-e-e'tibār kyā

itnā bhī intizār-e-dost haa.e ye e'tibār-e-dost
ai dil-e-be-qarār-e-dost dost pe iḳhtiyār kyā

miTtī huī hayāt kyā luTtī huī bahār kyā
ya.anī qarīb-e-sub.h-e-ġham sham.a kā e'tibār kyā

ishrat-e-zīst kī qasam ishrat-e-musta.ār kyā
ġham bhī jo mustaqil na ho ġham kā bhī e'tibār kyā

ishq-e-sitam-parast kyā husn-e-sitam-shi.ār kyā
ham bhī unhīñ ke haiñ to phir apnā bhī e'tibār kyā

judā hai rañg-e-suḳhan 'tāj' har suḳhan-var kā
ba-etebār-e-nazar, fikr-o-fan badalte haiñ

tū jo hasb-e-va.ada na aa sakā to bahānā aisā nayā banā
ki tirā vaqār bhī kam na ho mirā e.atibār bhī kam na ho

ab kisī par yaqīñ nahīñ hai mujhe
is qadar e.atibār zaḳhmī hai

sādgī-e-dil dekho e'tibār kar baiThe
ho ga.e usī ke ham jis ko āshnā paayā

ḳhanjar kā e.atibār nahīñ vo to saaf hai
lekin milegī ḳhuun se qātil kī āgahī

nazroñ kā e.atibār to hai phir bhī merā dil
hai ik sahīfa jis meñ masā.il kī āgahī

tum ne va.ada to kar liyā lekin
saañs kā koī e'tibār nahīñ