Tags-Peace

is taraf amn-o-baqā aur us taraf jañg-o-fanā
dekhiye ye kārvāñ kis samt 'mullā' jaa.e hai

yuuñ to pur-amn hai ab shahr-e-sitamgar lekin
kuchh makāñ ḳhud hī sar-e-rāhguzar jalte haiñ

mujh ko ehsās hai ab ḳhāk-e-vatan ko hai zarūrat merī
gulshan-e-amn-o-mohabbat ko hai hājat merī

amn kī shāḳh pe baiThe hue panchhī saare
shar-pasandoñ kī sharārat se dahal jaate haiñ

bādaloñ ne aaj barsāyā lahū
amn kā har fāḳhta rone lagā

amn gar qaa.em rahe to kis tarah
sharpasandī baḌh ga.ī hai aaj kal

amn parchār talak Thiik sahī lekin amn
tum ko lagtā hai ki hogā nahīñ hone vaalā

amn aur tere ahd meñ zālim
kis tarah ḳhāk-e-rahguzar baiThe

na.ī zamīñ na koī āsmān māñgte haiñ
bas ek gosha-e-amn-o-amān māñgte haiñ

parvāz meñ thā amn kā ma.asūm parinda
sunte haiñ ki be-chāra shajar tak nahīñ pahuñchā

zulm-o-sitam ho ḳhatm na ho dahshat-gardī
amn-o-amāñ kī yuuñ bārish kar de maulā

ba-nām-e-amn haiñ jañg-o-jadal ke mansūbe
ba-shor-e-adl tafāvut ke kār-ḳhāne haiñ

us kī taraf hai amn kā parcham lagā huā
lekin mirā vo ḳhvāb meñ talvār dekhnā

har ḳhauf se pahlū kā bachānā nahīñ achchhā
ai amn-talab hashr meñ kaam aa.egā Dar bhī

vo mohabbat ho siyāsat ho ki ho amn ki jañg
ab to har moḌ pe bāzār nikal aate haiñ

jis ne paiham koshisheñ kiiñ amn-e-ālam ke liye
vo ḳhud apne hī chaman ko surḳh-rū kartā rahā

vo jis kī miTTī meñ pal rahe the shagūfe amn-o-amāñ ke logo
usī pe barsā lahū kā bādal usī pe saare azaab TuuTe

amn meñ hissa chhoḌ chukā huuñ
ek parinda chhoḌ chukā huuñ

jañg vahshat se barbariyyat se
amn tahzīb o irtiqā ke liye

jañg iflās aur ġhulāmī se
amn behtar nizām kī ḳhātir