Tags-Phool

us din kitne phuul khile
us din kitnī jhaḌī rahī

phuul khilte haiñ to murjhā.e hue lagte haiñ
ik ajab ḳhauf sar-e-shāḳh-e-gumāñ rahtā hai

mahakte phuul sitāre damaktā chāñd dhanak
tire jamāl se kitnoñ ne istifāda kyā

māhaul ḳhush-gavār havā bhī thī tāza-dam
ik phuul dast-e-shāḳh pe naġhma-sarā huā

baat jab hai ki har ik phuul ko yaksāñ samjho
sab kā āmeza vahī aab vahī gil bhī vahī

khile haiñ phuul suḳhan ke jalī hai sham-e-ḳhayāl
qafas meñ jhāñk ke dekho qafas-zadoñ kā kamāl

chāndnī rātoñ meñ ik ik phuul ko
be-ḳhudī kahtī hai sajda kījiye

ye baaġh dasht meñ tabdīl ho rahā hai 'hasan'
jo shāḳh-e-phūl thī pahle babūl hone lagī

pa.e fātiha koī aa.e kyuuñ koī chaar phuul chaḌhā.e kyuuñ
koī aa ke sham.a jalā.e kyuuñ maiñ vo bekasī kā mazār huuñ

maiñ apne phuul khilā.e haiñ us kī jhāḌī par
qabā-e-yār bahut reshmīñ huī mujh se

phuul kī aañkh meñ shabnam kyuuñ hai
sab hamārī hī ḳhatā ho jaise

ḳhuun pattoñ pe jamā ho jaise
phuul kā rañg harā ho jaise

jis tarah phuul kī gulistāñ ko
zindagī ko mirī zarūrat hai

phuul khileñ to havā meñ ḳhushbū ho hī jaatī hai tahlīl
dil kī bāteñ samho par un kī tafsīr nahīñ karnā

sub.h kī shart pe manzūr haiñ rāteñ ham ko
phuul khilte hoñ to kuchh roz ḳhizāñ aur sahī

ab chaman kī rakhvālī mashġhala hai bachchoñ kā
phuul jab nahīñ paa.e nochne lage patte

ham ne isī zamīn pe 'fānī' khilā.e phuul
muddat se jis zamīñ kī ghaTā se nahīñ banī

chāñdnī sard havā phuul parinde ḳhushbū
rāt-bhar terī zarūrat kā maza letā huuñ

ai but-e-tauba-shikan maiñ tujh se mil kar sochtā huuñ
phuul meñ hotī nazākat kaash patthar se ziyāda

phuul rote haiñ ḳhaar hañste haiñ
dekh! gulshan kā ye nazārā bhī