Tags-Phool

ik hasīñ phuul ban ke girtī hai
barq bhī mere āshiyānoñ meñ

vo phuul thā jādū-nagrī meñ jis phuul kī ḳhushbū bhaa.ī thī
use laanā jaan gañvānā thā aur apnī jaan parā.ī thī

vo bastiyāñ ki jahāñ phuul haiñ darīchoñ meñ
isī navāh meñ vīrāne honā chāhte haiñ

us kī ḳhushbū kī chaap sunte hī
phuul khilne lage the bele meñ

maiñ ġhazal kī shabnamī aañkh se ye dukhoñ ke phuul chunā karūñ
mirī saltanat mirā fan rahe mujhe tāj-o-taḳht ḳhudā na de

baat āġhāz phuul se hogī
baat kā iḳhtitām ḳhushbū hai

phuul mausam kī nazar ho ga.e sab
jis ne paayā davām ḳhushbū hai

ham se tohfe meñ phuul kyuuñ kar le
us kā to apnā naam ḳhushbū hai

bunī haiñ sāzisheñ mausam ne dhuup se mil kar
havā ne mere har ik phuul ko ḳharāshā hai

titliyāñ phuul meñ kyā DhūñDhtī rahtī haiñ sadā
kyā kahīñ bād-e-sabā rakh ga.ī paiġhām tirā

koī shai mushtarak hai phuul kāñToñ aur sho.aloñ meñ
jo dāman se lipaTte haiñ garebānoñ meñ aate haiñ

phuul toḌ ke log le ga.e ūñche baḌe makānoñ meñ
ab ham kāñTe sajā ke rakkheñ miTTī ke gul-dānoñ meñ

kāñToñ pe chale haiñ to kahīñ phuul khile haiñ
phūloñ se mile haiñ to baḌī choT lagī hai

na chāñd thā na sitāra na phuul thā na dhanak
vo phir bhī husn kī duniyā meñ ik izāfa thā

lage haiñ shāḳhoñ pe jis din se phūl-pāt na.e
har ek peḌ havelī kā chashm-e-bad meñ hai

ḳhālī dar-o-dīvār kī ḳhushbū pāgal rakhtī hai mujh ko
jaane kahāñ vo phuul khilā hai jis kā māñ-jāyā huuñ maiñ

sahrā kā koī phuul mo.attar to nahīñ thā
thā ek chhalāvā koī manzar to nahīñ thā

ham ek fikr ke paikar haiñ ik ḳhayāl ke phuul
tirā vajūd nahīñ hai to merā saayā nahīñ

thī yahī tamhīd mere mātamī anjām kī
phuul hañste haiñ to hotī hai pashīmānī mujhe

milī haiñ mujh ko virāsat meñ kuchh ajab qadreñ
samāj ne diye haiñ kāġhzī se phuul mujhe