Tags-Phool

ham sarāboñ meñ sadā phuul khilāte guzre
ye bhī thā ābla-pā.ī kā salā kiyā karte

raunaq gulshan jo vo riñd-e-sharābī ho gayā
phuul sāġhar ban gayā ġhuncha gulābī ho gayā

sunā.ī dī hai kahīñ kyā ḳhizāñ ke pānoñ kī chaap
ki phuul aaj haiñ gulshan meñ sahme sahme se

sub.h zindāñ meñ bhī hotī hogī
phuul maqtal meñ bhī khilte hoñge

roz-o-shab ke unhī vīrānoñ meñ
ḳhvāb ke phuul to khilte hoñge

kis lagan kis tamannā se kis chaav se mausam-e-rañg-o-nik.hat ko dī thī sadā
kyā ḳhabar thī ki abr-e-bahār-āfrīñ aag ke phuul gulshan pe barsā.egā

ḳhushiyoñ kī rut par bhī un ke pahre haiñ
be-mausam ke phuul khileñ to khilne do

maiñ ne to apne saare phuul us ke chaman ko de diye
ḳhushbū uḌī to ik zarā merā bhī naam ho gayā

maiñ tumheñ phuul kahūñ tum mujhe ḳhushbū denā
mere baazū meñ zarā pyaar se baazū denā

chhupā.eñ dāġh-e-jigar phuul jitnā mumkin ho
kahīñ na ahl-e-nazar un ko dil-figār kaheñ

jaane toḌe the kis ne kis ke liye
phuul mere gale paḌe hue the

hai lutf-e-zīst ye ki vo baiThā ho rū-ba-rū
bikhre hoñ phuul idhar to dharī ho udhar sharāb

kahīñ aisā to nahīñ hai ki havā ruuTh ga.ī
muntazir phuul haiñ bāġhoñ meñ bikharne ke liye

dil hī āsūda jo nahīñ
phuul bharā har āñgan jhuuT

zamīñ pe Dher kiye dopahar ke sūraj ne
tamām phuul shab-e-māh ke khilā.e hue

ab koī taaza phuul khilā ḳhāk-e-pā.emāl!
apnā lahū zamīñ ko pilāte rahe haiñ ham

kāñToñ meñ ghire phuul ko chuum aa.egī lekin
titlī ke paroñ ko kabhī chhilte nahīñ dekhā

tan man meñ phuul sajātī thiiñ
jab chāñd kī rim-jhim kirnoñ se

gulshan ke dil meñ aaj bhī mahfūz haiñ vo phuul
murjhā ga.e jo dāġh-e-bahārāñ liye hue

qaid meñ gul jo yaad aayā to phuul sā dāman chaak kiyā
aur lahū phir ro.e goyā bhūle nahīñ asīrī meñ