Tags-Politics

samajhne hī nahīñ detī siyāsat ham ko sachchā.ī
kabhī chehra nahīñ miltā kabhī darpan nahīñ miltā

ye kabhī kabhī ināyat hai ba-manzil-e-siyāsat
ki jafā.eñ sahne vaalā kahīñ ho na jaa.e aadī

patthar kī siyāsat se jo mahfūz rahā ho
aisā kisī shīshe kā muqaddar nahīñ dekhā

bigḌe hue tevar haiñ nau-umr siyāsat ke
biphrī huī sāñseñ haiñ nau-mashq nizāmoñ kī

ek hī aadam se haiñ lekin siyāsat ke nisār
kis qadar firqe bane kitne qabīle ho ga.e

gard uḌaa.ī jo siyāsat ne vo āḳhir dhul ga.ī
ahl-e-dil kī ḳhaak meñ bhī zindagī paa.ī ga.ī

zarā dekh jalte hue shahr ko
siyāsat ke rauzan haiñ sab se baḌe

kahīñ dillī kī saḌkoñ par bhalā insāf miltā hai
magarmachchhoñ ke aañsū ko siyāsat ne bahā rakkhā

darūd bar-sar-e-karb-e-taġhayyur-e-mausam
ġham-e-siyāsat-e-ahl-e-jahāñ to kuchh bhī nahīñ

chehre haiñ ki sau rañg meñ hote haiñ numāyāñ
ā.īne magar koī siyāsat nahīñ karte

har ik fasād zarūrat hai ab siyāsat kī
har ik ghoTāle ke pīchhe vazīr rahte haiñ

tum ahl-e-siyāsat kyā jaano ham ahl-e-qalam ke jazboñ ko
jo ḳhūn-e-jigar se likh deñ to sab kā ghabrānā lāzim hai

kitne chehre lage haiñ chehroñ par
kyā haqīqat hai aur siyāsat kyā

rahnumā apne vatan ke bhī haiñ kitne shātir
vo shahādat pe siyāsat kī ġhazal likhte haiñ

siyāsat ke añdheroñ ne ujāle sab nigal Daale
ġharīb insān din ko bhī shab-e-tārīk samjhe hai

jamī hai gard siyāsat kī jin ke zehnoñ par
mushā.era bhī adab ke baġhair chāhte haiñ

koī āsūda nahīñ ahl-e-siyāsat ke sivā
ye sadī dushman-e-arbāb-e-hunar lagtī hai

jaa.eñ to kahāñ jaa.eñ mohabbat ke ḳharīdār
arbāb-e-siyāsat ne to kholī hai dukāñ aur

ham ahl-e-mohabbat pā leñge apne hī sahāre manzil ko
yārān-e-siyāsat ne har-sū phailā.e haiñ rañgīñ jaal to kyā

ik siyāsat hai ki hai dair-o-haram kī mahbūb
ik mohabbat hai ki rusvā-e-jahāñ hai yaaro