Tags-Alam

ham laash samajh kar jise pheñk aa.e the vo shaḳhs
chaTTān kī mānind alam ban ke khaḌā hai

ḳhvāb hai aur unheñ paane kī azmat bhī hai
ilm hai zabt hai aur jazba-e-mehnat bhī hai

alam kī ibtidā hai hañgāma
alam kī intihā hai ḳhāmoshī

un ke kahne se use toḌ duuñ kaise āḳhir
ilm jin ko nahīñ kyā hai mire paimāne meñ

rū-ba-rū tere huā asfal-o-a.alā kā zuhūr
ilm-e-ḳhāliq meñ tū thā arz-o-samā se pahle

apnī hairat kā to hai ilm yaqīñ se pahle
tū batā mujh ko hai kyā mere gumāñ se aage

maiñ apnī vafāoñ kā bharam le ke chalī huuñ
hāthoñ meñ mohabbat kā alam le ke chalī huuñ

vo bhaTakte haiñ jahālat ke añdheroñ meñ yahāñ
paas jin ke ilm kā thoḌā bhī sarmāya nahīñ

ghar se niklūñgā hathelī par liye ujlā charāġh
ilm hai kaalī havā kā sāmnā ho jā.egā

zindagii ho mirii parvaane kii suurat yaa-rab
ilm kii sham.a se ho mujh ko mohabbat yaa-rab

ḳhair ummat haiñ mohabbat haiñ vafā pyaar haiñ ham
amn-e-ālam ke zamāne meñ alam-dār haiñ ham

ai shahanshāh-e-kavākib sipah-o-mehr-e-alam
tere ikrām kā haq kis se adā hotā hai

himmat hai to buland kar āvāz kā alam
chup baiThne se hal nahīñ hone kā mas.ala

zehn meñ dā.ere se banātā rahā duur hī duur se muskurātā rahā
maiñ samundar nahīñ chāñd ko ilm hai raat bhar phir bhī mujh ko bulātā rahā

in ilm-o-āgahī kī kitāboñ meñ kuchh nahīñ
kyā DhūñDhtā hai yaar nisāboñ meñ kuchh nahīñ

ilm jab kuchh bhī na thā to is qadar jāhil na the
ilm kuchh hāsil huā to aur jāhil ho ga.e

muskurāhaT meñ koī tanz bhī ho saktā hai
ye masarrat kī alam-dār ho aisā bhī nahīñ

lahū kī surḳhiyāñ mere alam haiñ
ḳhizāñ ke zard lashkar se laḌūñgā

mujh ko hai ilm tū rātoñ meñ kahāñ jaatā hai
āj-kal maiñ ne sitāroñ se banā rakkhī hai

ujālā ilm kā phailā to hai chāroñ taraf yaaro
basīrat aadmī kī kuchh magar kam hotī jaatī hai