Tags-Qabr

na sham.a rotī hai aa kar na barq hañstī hai
maiñ jab se qabr meñ huuñ bekasī barastī hai

diyā mujhe maut ne sambhālā lahad meñ bhī ho gayā ujālā
ye qabr par kis ne gul chaḌhā.e ye kaun māh-e-tamām aayā

evaz chūne ke gaarā laa.e mai kā chāhiye saaqī
hamārī qabr agar pakkī ho to ḳhisht-e-sar-e-ḳhum se

aa ga.ī mujh ko nazar ġhāyat-e-chashm-e-mushtāq
qabr meñ aa ke mohammad kī jo sūrat dekhī

bujh bujh ke jalī thī qabr par sham.a
jal jal ke tamām ho ga.ī hai

chaliye ai jān-e-shām aaj tumheñ
sham.a ik qabr par jalānī hai

hasrat baras rahī hai hamāre mazār par
kahte haiñ sab ye qabr kisī naujavāñ kī hai

maiñ guzar ke aayā huuñ qabr se ki ilāqa rakhtā huuñ sabr se
mirī ruuh meñ koī iztirāb-e-fanā na ho kahīñ yuuñ na ho

yahāñ to rasm hai zindoñ ko dafn karne kī
kisī bhī qabr se murda kahāñ nikaltā hai

koī jugnū bhaTaktā aa gayā to aa gayā varna
charāġh-e-qabr ban kar ham akele hī jale barsoñ

Dhalne lagī javānī jo aa.ī thī chaar din
Thahrā buḌhāpā qabr talak rahbarī ke saath

maiñ ḳhudā kī qabr huuñ
ḳhudā mere andar dafn hai

ai sitamgār qabr-e-āshiq par
chand aañsū tujhe bahānā thā

vahshat na qabr meñ ho tum sāmne hī rahnā
dast-e-junūñ na merā bāhar kafan se nikle

āḳhir us ke bhī gayā dil kā dhḌaknā us roz
qabr kā teshe ne jab us ke tarāshā ta.avīz

miTānā thā use bhī jazba-e-shauq-e-fanā tujh ko
nishān-e-qabr-e-majnūñ daaġh hai sahrā ke dāman meñ

tū fātiha-ḳhvānī ko agar qabr par aatā
marne se mire ġhair kā matlab na bar aatā

qabr jaisī nā-pasandīda jagah bhī 'irtizā'
dil kabhī hargiz na chāhegā magar jā.eñge aap

miT gayā huuñ kisī aur kī qabr meñ
merā katba kahīñ be-nishāñ rah gayā

nishān-e-qabr bhī DhūñDhe se ab miltā nahīñ 'sho.ala'
miTā hai safha-e-hastī se yuuñ nām-o-nishāñ apnā