Tags-Qabr

utar ke ruuh kī gahrā.iyoñ meñ ham har roz
ḳhud apnī qabr meñ apnā badan utārte haiñ

maiñ ne to jism kī dīvār hī Dhaa.ī hai faqat
qabr tak khodte haiñ log ḳhazāne ke liye

sham.a jalvāte haiñ ġhairoñ se vo merī qabr par
ye na.ī sūrat nikālī hai jalāne ke liye

ik sāneha sā dafn huuñ lekin kabhī kabhī
sadiyoñ kī qabr se bhī uThāyā gayā huuñ maiñ

gosha-e-qabr hai na qasr buland
na zamīñ hai na āsmāñ apnā

qabr-e-'naqqāsh' DhūñDne vaalo
merī miTTī ḳhudā kī raah meñ hai

tanhā.ī kī qabr se uTh kar maiñ saḌkoñ par kho jaatā huuñ
chehroñ ke gahre sāgar meñ murda āñkheñ pheñk aatā huuñ

kyuuñ chheḌte haiñ mujh ko nakīrain qabr meñ
jo so rahā ho us ko jagānā azaab hai

go janāze pe nahīñ qabr pe aa.e vo mirī
shikva kyā kiije ġhanīmat hai ki aa.e to sahī

naqsh-e-pā pañch-shāḳha qabar par raushan karo
mar gayā huuñ maiñ tumhārī garmī-e-raftār par

mujhe ek āshiq-e-ḳhasta kī kahīñ kal jo qabr nazar paḌī
na kisī se koī lagā.e jī ye khudā ba-lauh-e-mazār thā

mujhe ai qabr duniyā chain se rahne nahīñ detī
chalā aayā huuñ itnī baat par ghar chhoḌ kar apnā

mere mātam meñ utārīñ aa ke merī qabr par
de ga.ī yuuñ mujh ko vo apnī nishānī chūḌiyāñ

ye bhī to kisī maañ kā dulārā koī hogā
is qabr pe bhī phuul chaḌhā de koī aa kar

jaan jaa.e yaar hai dil ko rahegā pās-e-ishq
qabr meñ jā.eñge tere rāz-e-ulfat mere saath

vo shaḳhs zindagī bhar kā thakā huā thā magar
jo paañv qabr meñ rakkhe thakān bhuul gayā

kalima paḌhtā huā qabr meñ utrā huuñ maiñ
mere maz.hab ko nakīrain ne samjhā kyā hai

huuñ vo āshiq ki tah-e-qabr maiñ jal jaatā huuñ
sham.a turbat par agar miltī hai parvāne se

yaad kartī huuñ apne maazī ko
haal kī qabr meñ paḌī tanhā

ba.ad-e-fanā bhī qabr ko mismār kar diyā
iz.hār-e-rañj kā na ho sāmāñ kisī tarah