Tags-Qatil

ḳhudā ke vāste dam bhar to ai bād-e-ajal tham jā
ki le luuñ kuchh havā maiñ dāman-e-shamshīr-e-qātil se

kisī hasrat-zada ne ḳhud-kushī manzūr kī dil se
sadā labbaik kī sun kar zamīn-e-kū-e-qātil se

mirā lohū bhī ba.ad-az-marg qātil ke tasadduq hai
sañjāf-e-surḳh mat samjhe koī gird is ke dāmāñ ke

kah rahī hai har adā qātil tumheñ
tum kahe jaao ki ham qātil nahīñ

qātil kī ināyat kā maza aur hai varna
jaañ lene ko ye saañs kī talvār bahut hai

ye pher mohabbat ke tauba ā.īn-e-jafā bhī aam nahīñ
qātil kī chhurī par ḳhuuñ to hai qātil pe magar ilzām nahīñ

mare jab ham koī charchā na niklā
mire qātil hī pahuñche the ḳhabar tak

ajiib kūcha-e-qātil kī rasm hai ki yahāñ
jo qatl kartā hai vo ḳhūñ-bahā bhī detā hai

rāteñ qātil sub.heñ mujrim mulzim hai har shaam
bāhar se chup chup lagtā hai andar hai kohrām

qātil kī shakl dekh ke hañgām-e-bāz-purs
nīyat badal ga.ī mire ik ik gavāh kī

paḌā hogā magar aks-e-ezār-e-lāla-gūñ varna
ye gustāḳhī hamārā ḳhuun aur qātil ke dāmāñ par

is shahr-e-sitam meñ pahle to 'manzūr' bahut se qātil the
ab qātil ḳhud hī masīhā hai ye zikr barābar hotā hai

kam-sinī kā husn thā vo ye javānī kī bahār
thā yahī til pahle bhī ruḳh par magar qātil na thā

falak na duur rakh us se mujhe ki maiñ hī nahīñ
darāz-dasti-e-qātil ke imtihāñ ke liye

tanhā.ī kī ḳhāmoshī!
ye ghūñT hai ik zahr-e-qātil kā

dam jo betāb thā muddat se mire siine meñ
teġh-e-qātil ke tale kuchh dam-e-bismil Thahrā

husn jis tifl kā chamkā vo huā bā.is-e-qatl
jis ne talvār sambhālī mirā qātil Thahrā

kū-e-qātil meñ dam-e-naz.a koī le jaao
jā ke us jā hameñ uqda hai ye hal kar aanā

terī chitvan ke bal ko ham ne qātil taak rakhā thā
kidhar maqtal meñ bach kar ham se ye tīr-e-qazā jaatā

kū-e-qātil hī sahī manzil-e-rāhat na sahī
thak ke baiThe haiñ ki aate haiñ bahut duur se ham