Tags-Qatil

jab lageñ zaḳhm to qātil ko duā dī jaa.e
hai yahī rasm to ye rasm uThā dī jaa.e

rahe na jaan to qātil ko ḳhūñ-bahā diije
kaTe zabān to ḳhanjar ko marhabā kahiye

vo shaḳhs aap hī qātil thā aap hī maqtūl
jahāñ jahāñ bhī gayā apnī laash chhoḌ gayā

dil dushman-e-jāñ hai to ḳhirad qātil-e-īmāñ
ye kaisī balāoñ ko mujhe sauñp diyā hai

ġhamza bhī ho saffāk nigāheñ bhī hoñ ḳhūñ-rez
talvār ke bāñdhe se to qātil nahīñ hotā

qātil huā ḳhamosh to talvār bol uThī
maqtal meñ ḳhūn-e-garm kī har dhaar bol uThī

kaisā qātil thā mirā shauq-e-shahādat dekh kar
rakh diyā zālim ne apne haath se shamshīr ko

dareġh karnā na zor-e-bāzū miTā le saarī kudūratoñ ko
havas na rah jaa.e koī qātil ki sar tah-e-ḳhanjar-e-do-dam hai

ye adā un kī masīhā bhī hai qātil bhī hai
sāmne aa ke nigāhoñ ko jhukā.e rakhnā

kahāñ hai shimr ko taufīq sharmsārī kī
magar hai ḳhanjar-e-qātil kī dhaat sharminda

kis ehsās-e-jurm kī sab karte haiñ tavaqqo
ik kirdār kiyā thā jis meñ qātil thā maiñ

'qalaq' us zulm kā phir kyā Thikānā
agar maqtūl le qātil se badle

agar ho chīñ-jabīñ qātil dam-e-qatl
qayāmat qāmat-e-qātil se badle

har ik ko jaan dene kī ḳhushī ho
ajal gar nāvak-e-qātil se badle

'shād' ne aaj ye maqtal meñ tamāshā dekhā
dast-e-qātil se lagī uḌne hinā aap hī aap

aur kyā bāñdhte sāmāñ meñ ba-hañgām-e-safar
sirf dāman meñ ḳhas-e-kūcha-e-qātil bāñdhā

har badī kartī hai insān ko duniyā meñ halāk
sam-e-qātil hai vo aadat jo burī hotī hai

mujh ko aġhyār se bhī ulfat hai
ki ye kushte haiñ mere qātil ke

kabhī gesū na bigḌe qātil ke
nāz-bardār haiñ mire dil ke

tīr-e-qātil ko kaleje se lagā rakkhā hai
ham to dushman ko bhī ārām diye jaate haiñ