Tags-Raasta

vo apne gird uThātā hai roz dīvāreñ
maiñ us kī samt nayā rāsta banātī huuñ

rāsta kyā kyā charāġhoñ kī tarah takte the log
silsila āñkhoñ meñ tā-hadd-e-nazar āñkhoñ kā hai

bas ik pareshāñ hujūm ke saath ham bhī shāmil haiñ chal rahe haiñ
na koī naqsh-e-qadam salāmat kahīñ koī rāsta nahīñ hai

ḳhud hī sau rāste nikalte haiñ
jab koī rāsta nahīñ hotā

saut-e-nāqūs-o-jaras ho yā azaañ ho yā jaras
rāsta ik aur jaatā hai salāsil kī taraf

nahīñ rahī tire naqsh-e-qadam kī baas yahāñ
ye rāsta tirī yādoñ se ab sañvarne lagā

tumhāre ba.ad koī rāsta nahīñ miltā
to tai huā ki udāsī ke ghar meñ rahnā hai

kisī maslahat ke ġhubār meñ kahāñ rāsta nazar aa.egā
use jā ke dekhiye dosto jise pesh-o-pas meñ sukūn hai

na tai huī tirī sham-e-jamāl se bhī jo raah
vahīñ pe merā junūñ rāsta dikhātā hai

haath āñkhoñ pe rakh ke chalte haiñ
rāsta ab to itnā raT gayā hai

rāsta rok rahī hai ik yaad
ye bhī dīvār girānī hai abhī

kis tavaqqo.a pe sañvarne lagī phir sochtī shaam
kis kī āñkhoñ kī chamak rāsta dikhlātī hai

sochte rahne se to manzil kabhī miltī nahīñ
chalte jaao rāste se rāsta mil jā.egā

jis kā har ek naqsh kaf-e-pā hai aa.ina
is rāh-rau ko DhūñDne ḳhud rāsta gayā

vo mohabbat kā rāsta kab hai
jis meñ patthar nahīñ babūl nahīñ

musāfirat pe maiñ teshe ke sañg niklā thā
jidhar gayā huuñ mire saath rāsta bhī gayā

kis liye ḳhaar hoñ talāsh meñ ham
ḳhud hī DhūñDegā rāsta ham ko

kabhī nā-āshnā tujhe saare raste
magar har rāsta ab dil-nashīñ hai

ajnabī musāfir ko rāsta dikhā.egā
kaun apnī chaukhaT par ab diyā jalā.egā

bhaTak rahā huuñ maiñ be-samt rāstoñ kī tarah
kisī bhī samt kā ho rāsta dikhā mujh ko