Tags-Raat

khulā hai raat kā tārīk jañgal
aur andhe raah dikhlāne lage haiñ

tamām din kisī rahmat kā saaya rahtā hai
ham aadhī raat ko aisā gunāh karte haiñ

dhuup chamkī raat kī tasvīr piilī ho ga.ī
din gayā aur sard tārīkī nukīlī ho ga.ī

koī sachche ḳhvāb dikhātā hai par jaane kaun dikhātā hai
mujhe saarī raat jagātā hai par jaane kaun jagātā hai

din bhar saḌkoñ par injīreñ bechne vaale bhūke bachche
raat ga.e injīr ko takte takte thak kar so jaate haiñ

jaltī bujhtī sham.oñ se pūchho raat ke siine kā dard
uḌte pakherū batlā.eñge sūraj kī har muskān

kab havā muTThī meñ aatī hai abas dauḌā kiyā
jaane kyā kyā kal yūñhī maiñ rāt-bhar sochā kiyā

ajab andāz se thā koī ġhazal-ḳhvāñ kal raat
'ābid'-e-sho.ala-navā hai mujhe ma.alūm na thā

vo raat vo bārish tūfānī us raat kā manzar yaad to kar
vo ik duuje ko mīThī Dish kyā tum ko khilānā yaad nahīñ

Darā sakī na mujhe tīrgī zamāne kī
añdherī raat se guzrā huuñ maiñ qamar kī tarah

raat vo aañsū bahā.e haiñ ki mere qalb par
sub.h kā āġhosh vā karnā mirī ujrat nahīñ

us ke lahje kā vo utaar chaḌhāo
raat kī narm rau nadī kā bahāo

raat kahtī hai mujh ko pyaar se dekh
mujh meñ hai chashm-e-yār kā gahrāo

shaam bhī hai sub.h bhī hai aur din bhī raat bhī
māh-e-tābāñ ab bhī hai mahr-e-daraḳhshāñ ab bhī hai

chāñd taare āsmānoñ meñ Tañge haiñ
raat kī taz.īn hotī jā rahī hai

samt-e-mashriq dekhtā huuñ maiñ ujālā
raat kī takfīn hotī jā rahī hai

maiñ iztirāb meñ huuñ shaam se sahar ke liye
koī charāġh atā kar de rāt-bhar ke liye

bas ek raat se kaise thakan utartī hai
badan ko chāhiye ārām kuchh ziyāda hī

hone lagtī hai dil-o-jāñ meñ jalan raat Dhale
jab bhī lau dete haiñ ḳhvāboñ ke badan raat Dhale