Tags-Raat

kyā batā.eñ jo guzartī hai hamāre dil par
yaad aate haiñ jab apnoñ ke sitam raat ga.e

ġharq ho jaatī hai jab niiñd meñ saarī duniyā
jaag uThte haiñ adīboñ ke qalam raat ga.e

roz aate haiñ sadā de ke chale jaate haiñ
dil ke darvāze pe kuchh ahl-e-karam raat ga.e

rok letī hai tirī yaad sahārā ban kar
Dagmagāte haiñ agar mere qadam raat ga.e

jin kī ummīd meñ ham din ko jiyā karte haiñ
TuuT jaate haiñ vahī qaul-o-qasam raat ga.e

jin kī qismat meñ nahīñ din kā ujālā 'mansūr'
un charāġhoñ meñ jalā karte haiñ ham raat ga.e

vahī jo raat pe chhāyā huā añdherā thā
sahar huī hai to vo raushnī se haar gayā

bach jaatā ek raat jo kaT jaatī aur 'mīr'
kāTeñ thiiñ kohkan ne bahut rāteñ bhāriyāñ

bāzār kā to hosh hai lekin nahīñ ye yaad
kal raat kaun chhoḌ gayā mere ghar mujhe

ābla-pā.ī hai rusvā.ī hai raat aa.ī hai
dāman ek ik se chhuḌā.ūñgā chalā jā.ūñgā

kisī kī yaad satātī hai raat din tum ko
kisī ke pyaar se majbūr ho ga.ī ho tum

ek sitāra raushan ho jo kabhī na bujhne vaalā ho
rasta jānā-pahchānā ho raat bahut an-jānī ho

ik mahaktī bahaktī huī raat hai laḌkhaḌātī nigāhoñ kī sauġhāt hai
pañkhuḌī kī zabāñ phuul kī dāstāñ us ke hoñToñ kī parchhā.iyāñ dosto

sulag rahī hai tire jism kī mahak har-sū
badal ga.ī hai tire pairahan se raat mirī

aap kitne saada haiñ chāhte haiñ bas itnā
zulm ke añdhere ko raat kah diyā jaa.e

har taraf bikhrā huā us kā badan
raat kī har ek karvaT

raat bhar jāgegā chaukī-dār ek
aur sab so jā.eñge ārām se

jaate kahāñ ki raat kī bāñheñ thiiñ mushta.il
chhupte kahāñ ki saarā jahāñ apne ghar meñ thā

kuchh aisā dhuāñ hai ki ghuTTī jaatī haiñ sāñseñ
is raat ke ba.ad aaoge shāyad na kabhī yaad

mujhe mehmāñ hī jaano raat bhar kā
diyā huuñ dostoñ meñ rahguzar kā