Tags-Raat

'irshād' saarī kāvisheñ bekār mahz haiñ
sarmā kī raat se tujhe hiddat kī aas hai

maiñ so rahā huuñ tire ḳhvāb dekhne ke liye
ye aarzū hai ki āñkhoñ meñ raat rah jaa.e

jaane kyā barsā thā raat charāġhoñ se
bhor samay sūraj bhī paanī paanī hai

raat kyā hotī hai ham se pūchhiye
aap to so.e saverā ho gayā

be-vajah na jaane kyuuñ zid hai un ko shab-e-furqat vāloñ se
vo raat baḌhā dene ke liye gesū ko sañvārā karte haiñ

kahīñ rañg-o-nūr-e-jamāl hai kahīñ bīm-o-fikr-e-ma.āl hai
kahīñ shaam ġhairat-e-sub.h hai kahīñ din bhī raat se kam nahīñ

raat bahut der se aañkh lagtī thī zarā
niiñd meñ kamra na thā ḳhvāb meñ bistar na thā

vo garmī-e-anfās vo jaaḌe kī ḳhunuk raat
ehsās meñ sho.ale se lapakte rahe tā-der

hoñToñ pe hañsī paiham aate hue sharmātī
ab raat nahīñ kaTtī ab niiñd nahīñ aatī

na koī ḳhvāb kamāyā na aañkh ḳhālī huī
tumhāre saath hamārī bhī raat kaalī huī

ye kū-e-mai-farosh meñ raulā huā ki raat
dahshat se vaañ Thahar na sakā pā-e-mohtasib

sahar tak haal kyā hogā hamārā
ḳhudā jaane abhī hai raat kitnī

jafā vaale hisāb is kā lagā leñ
vafā kartā huuñ maiñ din raat kitnī

vo rātoñ-rāt 'sirī-krishn' ko uThā.e hue
balā kī qaid se 'basdev' kā nikal jaanā

saa.e baḌhne lage aur jaise kahīñ raat huī
der tak baiThe rahe āñkhoñ meñ āñkheñ Daale

safar safar hai kabhī rā.egāñ nahīñ hotā
sar-e-sahar chalī aa.ī hai raat chalte hue

us kī āñkhoñ se churā kar kuchh ashk
raat kī pahlī kamā.ī maiñ ne

ab kyuuñ hai udāsī kā samāñ hadd-e-nazar tak
kal raat ḳhayāloñ meñ koī jaag rahā thā

abhī to raat ke sab nigah-dār jāgte haiñ
abhī se kaun charāġhoñ kī lau nishāna kare