Tags-Raat

saarī saarī raat jale haiñ jo apnī tanhā.ī meñ
un kī aag se sub.h kā sūraj apnā diyā jalātā hai

raat ke muñh par ujālā chāhiye
chor ke ghar meñ bhī taalā chāhiye

kisī sitāre se kyā shikāyat ki raat sab kuchh bujhā huā thā
fasurdagī likh rahī thī dil par shikastagī kī na.ī kahānī

raat hī raat meñ tamām tai hue umr ke maqām
ho ga.ī zindagī kī shaam ab maiñ sahar ko kyā karūñ

har taraf imbisāt hai ai dil
aur tire ghar meñ raat hai ai dil

raat ik ghar jal gayā!
ghar jalā to aag meñ

bhaTak rahā thā añdhere meñ dard kā dariyā
vo ek raat kā jugnū thā raah jaisā thā

takmīl-e-junūñ ab bhī hai is misre se mashrūt
ai chāñd mubārak ho tujhe raat suhānī

mire dil kī taraf ik baar bhejī thī kiran us ne
bhulā dī chāñd ne us raat se tābindagī apnī

kisī ke hijr se aage baḌhī na umr mirī
vo raat biit ga.ī 'naqsh' ratjagā na gayā

jaltā bujhtā ek jugnū kī tarah terā ḳhayāl
bas yahī nisbat hai apnī raat ko tanvīr se

na jaane raat ga.e kis kī nuqra.ī āvāz
khanaktī hai mere kānoñ meñ chūḌiyoñ kī tarah

vo kaun hai jis kī vahshat par sunte haiñ ki jañgal rotā hai
vīrāne meñ aksar raat ga.e ik shaḳhs hai pāgal rotā hai

mahr sadiyoñ se chamaktā hī rahā aflāk par
raat hī taarī rahī insān ke idrāk par

ham-rañg-e-dil-e-pur-ḳhūñ har lāla-e-sahrā.ī
gesū kī tarah muztar ab raat kī raanī hai

shaam kaThin hai raat kaḌī hai
aao ki ye aane kī ghaḌī hai

maiñ ek hijr-e-be-murād jheltā huuñ raat din
jo aise sabr kī tarah hai jis kā phal nahīñ rahā

mirī raat kyuuñ kar kaTegī ilāhī
mujhe din ko taare nazar aa rahe haiñ

diloñ meñ dāġh-e-mohabbat kā ab ye aalam hai
ki jaise niiñd meñ Duube hoñ pichhlī raat charāġh

tanhā.iyoñ kī barf thī bistar pe jā-ba-jā
sho.aloñ kā raqs raat badan par na ho sakā