Tags-Raat

ye raat hai vasl kī mirī jaañ bhare haiñ dil meñ hazāroñ armāñ
nahīñ na nikle zabāñ se haañ haañ are ye mauqa.a nahīñ nahīñ kā

ye raat itnī jo baḌh ga.ī hai siyāhī itnī jo chaḌh ga.ī hai
kahīñ khulā hai zarūr joḌā kisī ke gesū-e-ambarīñ kā

tirī jānib se dil meñ vasvase haiñ
ye kutte raat bhar bhoñkā kiye haiñ

tujh bin ai māh-rū kabhī mujh ko
chāñdnī raat ḳhush nahīñ aatī

ulTe sīdhe gire paḌe haiñ peḌ
raat tūfān se laḌe haiñ peḌ

dhuāñ uḌāte hue din ko raat karte hue
malañg aag se tathīr-e-zāt karte hue

yaad bhī qātil kī hai shamshīr qātil
raat ḳhūñ-āshām ho kar ga.ī hai

tum ko aanā thā na aa.e vaqt lekin kaT gayā
muzmahil hote ho kyuuñ ham raat ro.e bhī kahāñ

kaash maiñ tere bun-e-gosh meñ bundā hotā
raat ko be-ḳhabarī meñ jo machal jaatā maiñ

kaTtī hai shab visāl kī palkeñ jhapakte hī
jis kī sub.h na ho kabhī vo raat bhī to ho

ye bādshāh nahīñ hai faqīr hai sūraj
hamesha raat kī jholī se din nikāltā hai

koī kamra hai jis ke taaq meñ ik sham.a jaltī hai
añdherī raat hai aur saañs lete Dar rahā huuñ maiñ

haath diyā is ne mire haath meñ
maiñ to valī ban gayā ik raat meñ

sahar kī dhuup sā nikhrā jamāl thā koī
vo chāñd-rāt meñ dilkash ḳhayāl thā koī

sahar ke nuur se be-nūr chāñd kā chehra
bichhaḌ ke raat se behad niDhāl thā koī

milegā kab mujhe be-rañg ratjagoñ kā javāb
ḳhamosh raat se lipTā savāl thā koī

ek taara ek dīpak ek jugnū hī sahī
raat kī dīvār meñ koī to dar baaqī rahe

kyā koī lamha-e-jāñ-soz hai aane vaalā
lau diye kī mire is raat fuzūñ-tar kyuuñ hai

raat jañgal kī shahar meñ aa.ī
ghar charāġhoñ se jagmagā.īñ kyā

ab tak bhī mere hosh Thikāne nahīñ hue
'sālik' kā haal raat ko aisā sunā ki bas