Tags-Raat

ek din raat kī sohbat meñ nahīñ hote sharīk
ham ko kyā fā.eda gar aap bahut haiñ nazdīk

ab to Tuk ho ke khaḌe baat hamārī sun lo
raat hai kūcha-o-bāzār paḌe haiñ tārīk

vo ek raat to mujh se alag na so.egā
huā jo lazzat-e-bos-o-kanār se vāqif

shu.ūr-e-ġham use dohrā.egā hazāroñ baar
ye ek raat ka.ī saal tak guzāregā

aa ki tere māthe par ab ise sajā duuñ maiñ
chāñd le ke aayā huuñ raat ke ḳhazāne se

apne bistar pe kisī raat hameñ niiñd aatī
aur phir ḳhvāb nahīñ aate zarūrat le kar

haañ namāzoñ kā asar dekh liyā pichhlī raat
maiñ idhar ghar se gayā thā ki udhar tū aa.ī

tere liye hī raat bhar ai mahr-e-zar-nigār
tārīkiyoñ ke naaz uThāte rahe haiñ ham

raat bhar tajraba-e-ḳhūn-e-jigar ham ne kiyā
sub.h-dam dasht ko gulzār banā kar uTThe

jāgne bhī na diyā shauq-e-tasavvur ne kabhī
aur 'maz.har' maiñ kabhī raat ko so bhī na sakā

'bedār' shart hai na palak se palak lage
dekheñ to raat jā ke hai yā tū sahar ki ham

paañv meñ duur kā safar chamke
raat bastī meñ jab khañDar chamke

ik sub.h hai jo huī nahīñ hai
ik raat hai jo kaTī nahīñ hai

phir aa ga.ī hai raat sitāre liye hue
sūraj chhupā charāg jalā jāgte raho

vo raat hai ki saa.e bhī aaseb ho ga.e
bujhne lagā galī kā diyā jāgte raho

din raat kis kī yaad thī kaisā malāl thā
sadqe meñ kuchh to bol tū kyā tujh pe haal thā

chashm meñ kab ashk bhar laate haiñ ham
raat din motī hī barsāte haiñ ham

raat ke me.ade meñ kaarī zahr hai jaltā hai jis se tan badan merā
maiñ kab se chīḳhtā huuñ dard se chillātā phirtā huuñ

javāñ hai raat sāqiyā sharāb lā sharāb lā
zarā sī pyaas to bujhā sharāb lā sharāb lā

chupke chupke raat ko tashrīf jab laatā hai chāñd
har taraf dhartī pe kaisā nuur barsātā hai chāñd