Tags-Raaz

chhupāo ham se na 'shāhīn' rāz-e-dil apnā
ki ham zabāñ nigah-e-shauq kī samajhte haiñ

vahī nigāh ki jis se jahāñ laraztā hai
ham us nigāh ko rāz-e-hayāt kahte haiñ

koī nahīñ hamrāz-e-tamannā koī nahīñ dam-sāz-e-safar
rāh-e-vafā meñ tanhā tanhā chalne par majbūr hai chāñd

chhuptā nahīñ hai dil meñ kabhī raaz ishq kā
ye aag vo hai jis ko nahīñ taab sañg meñ

hai raaz kyā ai mohabbat batā de ham ko zarā
qarīb aane pe kyuuñ intizār hone lagā

ye rāz-e-mohabbat hai samjhegā zamāna kyā
tum hāsil-e-dīñ āḳhir ġhārat-gar-e-dīñ pahle

shab-e-vasl meñ mah ko uryāñ kareñge
ayaañ hoñge rāz-e-nihāñ kaise kaise

aao banā.eñ kashtiyāñ kāġhaz kī chal ke raaz
purvā chalī hai jhuum ke bādal uThā bhī hai

zabt-e-girya se rāz-e-ġham thā chhupā
khul gayā aaj chashm-e-pur-nam se

ban gayā ġhammāz shakl un kī dikhā kar ā.īna
jo hamārā rāz-e-dil thā ab hai un par ā.īna

be-rāz rāste haiñ manāzir udaas haiñ
qistoñ meñ mere shahr kā nīlām kyuuñ huā

har ek zarra hai aalam kā gosh-bar-āvāz
to phir kahāñ pe koī guftugū-e-rāz kare

mirī samajh meñ aa gayā har ek rāz-e-zindagī
jo dil pe choT paḌ ga.ī to duur tak nazar ga.ī

likhte rahe junūñ kī hikāyāt ḳhūñ-chakāñ
lekin kisī pe raaz ye ifshā na kar sake

mohabbat ko abhī tak maiñ ne apnī raaz rakkhā hai
tumhārā zikr yuuñ mujh se saare mahfil nahīñ hotā

safar meñ ek hujūm thā magar ye raaz ab khulā
ki koī bhī yahāñ kisī ke saath chal nahīñ rahā

rāz-e-fitrat se ayaañ ho koī manzar koī dhun
sāz-e-hastī se bhī nikle koī paikar koī dhun

ahvāl-e-dil-e-zār sunāyā nahīñ jaatā
jo raaz ayaañ ho vo batāyā nahīñ jaatā

vo mohtasib ho ki vaa.iz vo falsafī ho ki shaiḳh
kisī se band tirā rāz-dāñ nahīñ hotā

vo lajā.e mere savāl par ki uThā sake na jhukā ke sar
uḌī zulf chehre pe is tarah ki shaboñ ke raaz machal ga.e