Tags-Rang

yahāñ vahāñ kuchh lafz haiñ mere nazmeñ ġhazleñ terī haiñ
rañg dhanak ye mahkā bādal sab tasvīreñ terī haiñ

maiñ rāz-e-rañg-o-bū se nā-āshnā nahīñ huuñ
mujh ko gila bhī kab hai phūloñ kī anjuman se

hai rahīn ġham mirī justujū ye hai kaisā gulshan-e-rañg-o-bū
yahāñ kuchh gulo kī talāsh meñ ka.ī ḳhaar maiñ ne chubho liye

kaun kahtā hai Thahar jaanā hai
rañg chaḌhnā hai utar jaanā hai

pattī pattī se huā rañg-e-vafā kā iz.hār
naujavānān-e-chaman ban ga.e tasvīr-e-bahār

aur hī rañg pe hai aaj bahār-e-gulshan
sair ke vāste aa.e haiñ azīzān-e-vatan

har baras rañg pe aatā hī gayā ye gulzār
phuul tahzīb ke khilte ga.e miTte ga.e ḳhaar

kyā kahūñ rañg-e-javānī meñ jo is raag ke the
bāġhbāñ ho ga.e gulchīñ jo mere baaġh ke the

dil meñ ik rañg hai lafzoñ se jo hotā hai ayaañ
lai kī muhtāj nahīñ hai mirī fariyād-o-fuġhāñ

kis ko ma.alūm thī is gulshan-e-aḳhlāq kī raah
maiñ ne phūloñ ko kiyā rañg-e-vafā se āgāh

rañg dikhlātī hai yuuñ dil kī safā yāroñ meñ
raushnī sub.h kī jis tarah ho gulzāroñ meñ

rashk-e-jināñ chaman ko banānā basant kā
har har kalī meñ rañg dikhānā basant kā

rañg-e-gul dekh ke dil qaum kā dīvāna huā
jo thā bad-ḳhvāh-e-chaman sabza-e-begāna huā

har samt sabza-zār bichhānā basant kā
phūloñ meñ rañg-o-bū ko luTānā basant kā

uḌā kar rañg kuchh hoñToñ se kuchh āñkhoñ se kuchh dil se
ga.e lamhoñ ko tasvīreñ banā kar dekh letā huuñ

ye bazm-e-shab sajā rahe haiñ rañg rañg qumqume
magar ye kaisī bazm hai ki ik bhī dil jalā nahīñ

durj-e-chashm meñ ashk ke motī le jaane haiñ un ke huzūr
chokhā rañg lahū kā de kar aur unheñ shahvār kareñ

nāzuk diloñ kā husn hai rañg-e-shikastagī
phaTne se kab guloñ kā huā pairahan ḳharāb

guloñ meñ shoḳh gulābī tumhīñ ne rañg bhare
chale bhī aao ke gulshan ne ab bulāyā hai

sukūn-e-dil jahān-e-besh-o-kam meñ DhūñDne vaale
yahāñ har chiiz miltī hai sukūn-e-dil nahīñ miltā