Tags-Rang

nik.hat-o-rañg kā paiġhām sabā laa.ī hai
bā-vafā kitnī mere desh kī purvā.ī hai

chaman kā rañg nikhartā hai jis ke partav se
bikher dī vo tajallī bhī chār-sū ham ne

samajh na paa.e vo ab tak qubūl-o-rad kaisā
ajiib rañg meñ kī sharh-e-ārzū ham ne

nirāle rañg meñ fasl-e-bahārāñ aa.ī hai yaaro
khile haiñ phuul bhī is baar lekin dil nahīñ lagtā

ajiib lams thā ab ke junūñ ke hāthoñ meñ
qabā-e-rañg meñ ḳhushbū se phir rahā na gayā

fareb-e-nik.hat-o-rañg āgahī shikār na ho
karishma-kār-e-chaman meñ agar bahār na ho

chaman meñ iḳhtilāt-e-rañg-o-bū se baat bantī hai
ham hī ham haiñ to kyā ham haiñ tum hī tum ho to kyā tum ho

hamāre ashk-e-ḳhūnīñ ne hinā.ī rañg laayā hai
are dil us ke paañv par ye āñkheñ ab to mal sakiye

paanī se sag-gazīda Dare jis tarah 'asad'
Dartā huuñ aa.ine se ki mardum-gazīda huuñ

ye kis kī āmad-o-shud se havā.eñ raqs kartī haiñ
ye kyuuñ mausam badalte haiñ miyān-e-rañg-o-bū kyā hai

tamāshā-gāh hai yā ālam-e-be-rañg-o-bū kyā hai
maiñ kis se pūchhne jā.ūñ ki mere rū-ba-rū kyā hai

maiñ tere va.ade ko jab āñsuoñ se dhotī huuñ
har ek lafz tirā rañg chhoḌtā kyuuñ hai

vo abr aayā vo rañg barse vo kaif jaagā vo jaam khanke
chaman meñ ye kaun aa gayā hai tamām mausam badal rahā hai

dekh kar rañg-e-mizāj-e-yār kyā kahiye 'firāq'
is meñ kuchh gunjā.ish-e-shukr-o-shikāyat bhī to ho

uḌte hī rañg-e-ruḳh mirā nazroñ se thā nihāñ
is murġh-e-par-shikasta kī parvāz dekhnā

junūñ rañg laayā hai phir fasl-e-gul meñ
nahīñ laala sab zaḳhm aale hue haiñ

rañg bāteñ kareñ aur bātoñ se ḳhushbū aa.e
dard phūloñ kī tarah mahke agar tū aa.e

tere shabāb ne kiyā mujh ko junūñ se āshnā
mere junūñ ne bhar diye rañg tirī shabāb meñ