Tags-Rang

rañg-e-mahfil dekh kar duniyā ne nazreñ pher liiñ
āshnā jitne bhī the nā-āshnā hone lage

aap ke dam se 'shāz' kā fan hai husn-e-bayāñ hai rañg-e-suḳhan hai
naam hamārā chal niklā hai sāhab-e-dīvāñ aap hue

mohabbat rañg de jaatī hai jab dil dil se miltā hai
magar mushkil to ye hai dil baḌī mushkil se miltā hai

narm alfāz bhalī bāteñ mohazzab lahje
pahlī bārish hī meñ ye rañg utar jaate haiñ

agar us ḳhush-dahan ke lab pe dekho rañg missī kā
to phir zinhār barg-e-ġhuncha-e-sosan na dekhoge

ab nigāhoñ meñ jachegā na koī rañg-o-jamāl
merī āñkhoñ ko pasand aa ga.ī rañgat terī

zulm kar zulm agar lutf dareġh aatā ho
tū taġhāful meñ kisī rañg se ma.azūr nahīñ

niiñd be-ḳhvāb chāhte the ham
raat be-rañg chāhte the ham

apne ham-rañg chāhte the ham
ek dil-tañg chāhte the ham

ḳhush-rañg hai gul se gul-e-ruḳhsār tumhārā
raihāñ se sivā ḳhat hai numūdār tumhārā

na tujh ko mast-e-havā-e-gulshan ḳhizāñ meñ ai andalīb dekhā
nahīñ tū shaidā.ī bāġh-o-gul kā magar fidā.ī hai rañg-o-bū kā

rañg-e-fitrat hai vaj.h-e-hairānī
aql hai aur hayā-e-nādānī

vo ek rañg mukammal ho jis se terā vajūd
vo rañg ham tire ḳhāke meñ bharne aa.e haiñ

rutoñ ke rañg badalte hue bhī banjar hai
vo ek ḳhaas ilāqa jo dil ke andar hai

is rañg-e-taġhazzul pe 'alī' chhāp hai merī
ye zauq-e-suḳhan mujh ko virāsat meñ milā hai

zindagī tishna bhī hai be-rañg bhī lekin 'surūr'
jab talak chehra faroġh-e-mai se tābinda na ho

oḌhe phirtā huuñ shahādat kī lahū-rañg qabā
rañg terā thā so vo hī mirī pahchān huā

ishq kī bū thī tajassus kā nasha shauq kā rañg
sāġhar-e-gul meñ tire vāste Dhāle ga.e ham

ki jaise rañg hī le aa.egā lahū apnā
vafā pe apnī hameñ e'timād kitnā hai