Tags-Religion

maz.hab-e-ishq kā payambar huuñ
haañ magar āḳhirī nahīñ huuñ maiñ

kabhī na hoñge murīd-e-jiddat nahīñ haiñ mushtāq-e-husn-e-bid.at
hamārā mashrab hai sūfiyāna hamārā maz.hab sanātanī hai

baġhair pūchhe mire sar meñ bhar diyā maz.hab
maiñ roktā bhī to kaise ki maiñ to bachcha thā

kisū mashrab meñ aur maz.hab meñ
zulm ai mehrbāñ nahīñ hai durust

kufr-o-islām ke jhagḌoñ se chhuḌāyā sad-shukr
qaid-e-maz.hab se junūñ ne mujhe āzād kiyā

batā jaa.ez hai kis maz.hab meñ ḳhūn-e-be-gunah zālim
tū hindū hai musalmāñ hai yahūdī hai ki tarsā hai

aur kuchh der yūñhī jañg siyāsat maz.hab
aur thak jaao abhī niiñd kahāñ aa.egī

aalam se hamārā kuchh maz.hab hī nirālā hai
ya.anī haiñ jahāñ ham vaañ islām nahīñ hotā

tujhe maz.hab miTānā hī paḌegā rū-e-hastī se
tire hāthoñ bahut tauhīn-e-ādam hotī jaatī hai

sab karishma hai faqat rañg-e-duī kā varna
mazhab-e-pīr-e-muġhāñ mushrib-e-rindāñ hotā

kabhī maz.hab thā dil meñ ab hai daulat kī panāhoñ meñ
ḳhudā kā naam le kar bhī gunahgārī kī bāteñ haiñ

ham kyā kaheñ kisī se kyā hai tarīq apnā
maz.hab nahīñ hai koī millat nahīñ hai koī

huuñ banda-e-ulfat nahīñ maz.hab kī hai ḳhvāhish
ye haal mirā sub.ha-o-zunnār se kah do

qaid-e-maz.hab vāqa.ī ik rog hai
aadmī ko chāhiye āzād ho

apne maz.hab meñ qarābat nahīñ ajdād kī shart
tujh se nisbat hai jise us se hameñ ḳhveshī hai

kabhī haram meñ hai kāfir to dair meñ momin
na jaane kyā dil-e-dīvāna terā maz.hab hai

maiñ kufr o diiñ se guzar kar huā huuñ lā-maz.hab
ḳhudā-parast se matlab na but-parast se kaam

pūjtā huuñ kabhī but ko kabhī paḌhtā huuñ namāz
merā maz.hab koī hindū na musalmāñ samjhā

ibādat ke liye bas rab nahīñ hai
mohabbat se baḌā maz.hab nahīñ hai

pairav nahīñ ek bhī 'zafar' kā
kis maz.hab-e-saḳht kā nabī hai