Tags-Rural

merā bachpan bhī saath le aayā
gaañv se jab bhī aa gayā koī

tum se quvvat le kar ab maiñ tum ko raah dikhā.ūñgā
tum parcham lahrānā sāthī maiñ barbat par gā.uñgā

mere qadmoñ se lipaT jaatī hai maañ kī mamtā
maiñ kahīñ gaañv se jaate hue thak jaatā huuñ

chāhatoñ ke sab panchhī uḌ ga.e parā.ī or
nafratoñ ke gaañv meñ jism-jism ghaao haiñ

gaañv gaañv ḳhāmoshī sard sab alaao haiñ
rah-rav-e-rah-e-hastī kitne ab paḌāv haiñ

gaañv bhar ḳhauf-zada hai us se
jo kabhī ghar se nikaltā hī nahīñ

bargad kī shāḳh toḌ dī āñdhī ne pichhlī raat
is vāste to gaañv kā būḌhā udaas hai

maiñ apne gaañv meñ rah kar bhī ajnabī hī rahā
mujhe to apnoñ se thoḌā sā pyaar bhī na milā

maiñ jab bhī gaañv apne lauTtā huuñ
kisī kī ruuh tishna dekhtā huuñ

soch rahā huuñ gaañv meñ jā kar kuchh din ab ārām karūñ
vahīñ kahīñ par rakh aayā huuñ niiñd purānī us ke paas

shahr se duur chal ke gaañv meñ
ek chhoTā sā ghar basā ke to dekh

gaañv meñ lag rahā hai phir melā
bachche bichhḌeñge kitne maaoñ se

ye merā gaañv har ik roz yuuñ damakne lagā
ke jugnuoñ ne yahāñ āshiyāñ banāyā hai

jab se aayā huuñ tere gaañv meñ
rañg hī rañg haiñ fazāoñ meñ

pakte guḌ kī ḳhushbū phail ga.ī bhauñrālī rātoñ meñ
gaañv kā rasta Thumak Thumak kar man ko kare ishārā sā

'sāqib' ham apne gaañv kī barbādiyoñ ke ba.ad
is dil meñ le ke hasrat-e-tāmīr chal paḌe

dam-e-sub.h aaj hai dopahar na vo chahchahe na vo zamzame
vo parinde uḌ ke kahāñ ga.e koī shor gaañv na ban meñ hai

ab ke gaañv meñ jaanā chāhā thā lekin
aisī huī barsāt ki rasta TuuT gayā

kab bājegā gaañv ke marghaT ke pare mandir ke sañkh
kab kaalā jaadū TūTegā raat Dhalegī kab tak yaar

shahr meñ aa kar bhaTakte phir rahe haiñ dar-ba-dar
sīdhā sā har rasta apne gaañv kā chhoḌ aa.e haiñ