Tags-Ruswai

rusvā.ī to rusvā.ī manzūr mujhe
Dare Dare se paañv na dharne vaalā maiñ

ham ko rusvā kar ke rusvā.ī se bachnā hai muhāl
tū bhī tash.hīr ai nigāh-e-fitna-gar hone ko hai

āḳhir mujhe bhī tamġha-e-rusvā.ī mil gayā
jo khel khelne kā na thā khel kar rahā

na shohrat hai na rusvā.ī mire pīchhe
magar hai merī tanhā.ī mire pīchhe

ab zauq-e-talab vaj.h-e-junūñ Thahar gayā hai
aur arz-e-vafā bā.is-e-rusvā.ī hai dekho

ai dil tujhe ijāzat-e-fariyād hai magar
rusvā.ī hai agar shunavā.ī na ho sakī

na kabhī aañkh bhar aa.ī na tirā naam liyā
bach ke chalte rahe har kūcha-e-rusvā.ī se

thā bolnā to ho ga.e ḳhāmosh ham sabhī
kyā kuchh kiyā hai shohrat o rusvā.ī ke liye

terī rusvā.ī kā na Dar ho agar
sar-e-mahshar pukār dūñgā maiñ

ho ga.ī shahr shahr rusvā.ī
ai mirī maut tū bhalī aa.ī

ishq rusvā-kun-e-ālam vo hai 'ahsan' jis se
nek-nāmoñ kī bhī bad-nāmī o rusvā.ī hai

maiñ chhupātā huuñ ġham-e-ishq to bantā nahīñ kaam
aur kahtā huuñ to goyā mirī rusvā.ī hai

rusvā.ī-e-sher-o-ishq ne vo rutba hameñ 'aḳhtar' baḳhshā hai
faḳhr-e-dakan-o-bañgāl haiñ ham nāz-e-avadh-o-panjāb haiñ ham

tujh ko sochā to patā ho gayā rusvā.ī ko
maiñ ne mahfūz samajh rakkhā thā tanhā.ī ko

apnī dariyā.ī pe itrā na bahut ai dariyā
ek qatra hī bahut hai tirī rusvā.ī ko

ḳhilqat-e-shahr to kahne ko fasāne māñge
merī rusvā.ī ke kyā kyā na bahāne māñge

jitnī rusvā.ī milī aap kī nisbat se milī
aap is baat se inkār nahīñ kar sakte

kuchh husn o ishq meñ farq nahīñ hai bhī to faqat rusvā.ī kā
tum ho ki gavārā kar na sake ham haiñ ki gavārā karte haiñ

tū nazar bhar ke sar-e-bazm na dekh un ko 'nazīr'
is se rusvā.ī-e-tahzīb-e-nazar hotī hai

ishq ik tabsira hai husn kī ra.anā.ī par
husn ik falsafa hai ishq kī rusvā.ī kā