Tags-Ruswai

merī rusvā.ī agar saath na detī merā
yuuñ sar-e-bazm maiñ izzat se nikaltā kaise

mere hone meñ hai kyā rusvā.ī
ai vo majlis nahīñ ḳhalvat hī sahī

ḳhuub honī hai ab is shahr meñ rusvā.ī mirī
beach bāzār ubhar aa.ī hai tanhā.ī mirī

hanūz ai asar-e-dīd nañg-e-rusvā.ī
nigāh fitna-ḳhirām o dar-e-do-ālam baaz

mohabbat ḳhauf-e-rusvā.ī kā baa.is ban hī jaatī hai
tarīq-e-ishq meñ apnoñ se pardā ho hī jaatā hai

maiñ ne samjhā thā jise bā.is-e-taskīn-e-nazar
us ne sāmān kiyā hai mirī rusvā.ī kā

shikast-e-ārzū rusvā.ī-e-fikr-o-nazar paiham
yahī hālāt mujh ko aap kā hone nahīñ dete

mirī fuġhāñ ko to samjheñge log merā junūñ
tirā sukūt na ban jaa.e vaj.h-e-rusvā.ī

pahuñchī mirī rusvā.ī kī kyūñkar ḳhabar us ko
us shoḳh ne to dekhnā aḳhbār bhī chhoḌā

ham na kahte the ki 'hālī' chup raho
rāst-goī meñ hai rusvā.ī bahut

maiñ chāndnī meñ bulātā to huuñ vo kah deñge
'qamar' tumheñ mirī rusvā.ī kā ḳhayāl nahīñ

naam is allāh ke bande kā bhī rusvā.ī meñ hai
jo samundar kī tarah se apnī gahrā.ī meñ hai

miTāyā pās-e-rusvā.ī se merī āshnā.ī ko
bichhā.ūñ aap kī ismat ko oḌhūñ pārsā.ī ko

ab koī tohmat bhī vaj.h-e-karb-e-rusvā.ī nahīñ
zindagī ik umr se chup hai tire isrār par

sañg-dil ahbāb ke dāman meñ rusvā.ī ke phuul
maiñ ne dekhā hai nayā manzar farāz-e-dār par

kyā ishq thā jo bā.is-e-rusvā.ī ban gayā
yaaro tamām shahr tamāshā.ī ban gayā

badnām bahut hai rāh-guzar, ḳhāmosh nazar, bechain safar
ab gard jamī hai ā.ankhoñ meñ aur duur talak rusvā.ī hai

sirf bachchoñ kī mohabbat meñ ye rusvā.ī huī
varnā sāhil par banāte ret kā ghar aur ham

siikh duniyā hī meñ zāhid huur se milne ke Dhañg
varna ro.egā ki jannat meñ bhī rusvā.ī huī

ġhulām rah chuke toḌeñ ye band-e-rusvā.ī
kuchh apne bāzu-e-mehnat kā ehtirām kareñ