Tags-Sabr

āgahī karb vafā sabr tamannā ehsās
mere hī siine meñ utre haiñ ye ḳhanjar saare

umiid rañj alam zabt dard sabr qalaq
ye sab hamāre dil-e-nā-tavāñ meñ rahte haiñ

ihānat-e-dil-e-sabr-āzmā nahīñ karte
buland ham bhī ye dast-e-duā nahīñ karte

rone ko ab ashk bhī nahīñ haiñ
yā ishq ko sabr aa gayā hai

kis tarah TuuTī qayāmat ham se mat ye pūchhnā
ab nahīñ hai sabr baaqī dard kī hai intihā

turfa fusūñ-sarisht hai chashm-e-karishma-sanj-e-yār
letī hai ik nigāh meñ sabr bhī aur qarār bhī

jab arbada-jū tum ho to kyuuñ sabr sameTeñ
ham is meñ raqīboñ kī sharārat na kaheñge

ibtidā-e-ishq hai lutf-e-shabāb aane ko hai
sabr ruḳhsat ho rahā hai iztirāb aane ko hai

dekhiye maut aa.e 'fānī' yā koī fitna uThe
mere qaabū meñ dil-e-be-sabr-o-tāb aane ko hai

ab sabr-o-tahammul kā ai 'tāj' ḳhudā-hāfiz
paimāna labālab hai dekho na chhalak jaa.e

hamāre saroñ ko fazā meñ uchhālo
hameñ shauq-e-sabr-āzmā meñ uchhālo

judā.iyoñ ke zaḳhm dard-e-zindagī ne bhar diye
tujhe bhī niiñd aa ga.ī mujhe bhī sabr aa gayā

sabr arzāñ huā jabr larzāñ huā
sāhab-e-shān-e-sad-iḳhtiyār aa gayā

ye māntā hai zamāna ki maiñ huuñ nāzish-e-sabr
ye raaz koī na samjhā ki merā naaz hai tū

sunñe vaale bas thoḌā sā sabr kareñ
qissa huā tamām kahānī ḳhatm huī

dostoñ kī bevafā.ī par 'hafīz'
sabr karnā bhī mujhe aa jā.egā

tāqat ab taaq huī sabr-o-shakebā.ī kī
kab talak sabr kare dil mirā ayyūb na thā

rañg lā.eñgī tamannā.eñ zarā sabr karo
vaqt lagtā hai duāoñ ko asar karne meñ

ka.ī roz meñ aaj vo mehr-liqā huā mere jo sāmne jalva-numā
mujhe sabr o qarār zarā na rahā use pās-e-hijāb-o-hayā na rahā

ik taraf vo hai aur us ke saare sitam
ik taraf sabr kī intihā aur maiñ