Tags-Sach

sach to hai apnī hī ġhaflat ne hai rauñdā ham ko
kis liye ham gila-e-gardish-e-ayyām kareñ

sach to baiTh ke khātā hai
jhūTh kamā kar laatā hai

barpā hai chashm-e-nāz meñ phir hashr-e-iltifāt
sach-much jafā pe koī pashemāñ hai āj-kal

jo jhuuT bole hukūmat se daad le jaa.e
jo bole sach use tohfe meñ auj-e-dār mile

sadā sach bolte ho tum bhī 'āzam'
tumhāre vāste bhī daar tai hai

jhuuT kā saath na dene kī qasam khaa.ī thī
phir bhī tere liye ham sach se mukar jaate haiñ

ye sach hai mujhe daad kī ḳhvāhish nahīñ 'saulat'
nā-qadrī-e-arbāb-e-suḳhan yaad rahegī

ye sach masal hai buto sab kā hai ḳhudā razzāq
nasīb-e-tā.ir-e-dil hai azal se dāna-e-ishq

kahānī dard-e-dil kī sun ke pūchhā
'qamar' sach kah ye kis kā hai fasāna

hamesha sach bolne kī aadat hai kyā ye sach bolte raheñge
qadam qadam par hai āzmā.ish sahal koī marhala nahīñ hai

ek hī zinda bachā hai ye nirālā pāgal
jhuuT ke shahr meñ sach bolne vaalā pāgal

mire ḳhudā tujhe ilzām de nahīñ saktā
ki sach to ye hai mirā tujh pe aasrā nahīñ thā

arz bose kī sach na jaano tum
ham to ai gul-ezār hañste haiñ

lafz kī hurmat muqaddam hai dil-o-jāñ se mujhe
sach ta.āruf hai mire har sher har tahrīr kā

shab-e-furqat daġhā dī zabt ne bhī
dilā sach hai kisī kā aasrā kyā

dukh kī baat to ye hai 'shāriq'
us kā vahm bhī sach niklā hai

rū-e-zamīñ nahīñ ki sar-e-āsmāñ nahīñ
sach pūchhiye to us ke nishāñ haiñ kahāñ nahīñ

sach hai tū ne kabhī mujh ko chāhā na thā
dil kahāñ, ek hone kī sūrat kahāñ

maiñ us se jhuuT bhī bolūñ to mujh se sach bole
mire mizāj ke sab mausamoñ kā sāthī ho

merī har soch meñ poshīda kahānī us kī
sach batā.ūñ to huuñ ḳhud maiñ bhī nishānī us kī